Almatydaǵy «alyp tıinge» qansha qarjy ketti
ALMATY. QazAqparat - Almatyda «Atakent» ortalyq kórme kesheniniń kireberisinde pablıkter álemindegi eń iri art-nysannyń ashylý saltanaty ótti. Altyn tıin pishindes nysannyń bıiktigi - 12 metr, salmaǵy - 12 tonna, dep habarlaıdy QazAqparat tilshisi.
«Tıinniń quny mıllıard teńge emes. Ǵalamtorda taraǵan aqparat - jalǵan. Tıin - memleket pen Funk agenttiginiń birlesip júzege asyrǵan jobasy. Memleket tarapynan 15 mıllıon teńge qarjy jumsaldy, al jobanyń jalpy quny 23 mıllıon teńgeni qurady», - dedi Funk agenttiginiń basshysy Maıra Izmaılova.
Osy maýsymda tıinnen bólek 15 art-nysandy ornatý josparlanǵan. Atalmysh jumystardyń barlyǵyn qazaqstandyq óner qaıratkerleri jasaǵan. 16 nysannyń jalpy quny 78 mıllıon teńge boldy. Bul somaǵa baıqaýdyń uıymdastyrylýy, sondaı-aq, tıinniń avtory Aleks Rınslerdiń qatysýy kirdi. Shyǵynnyń biraz bóligin Funk agenttigi kótergen. Bul jóninde Almaty qalasynyń Mádenıet basqarmasy basshysynyń orynbasary Naılıa Mýlıýkova málim etti.
Jańa art-nysannyń «Atakent» kórmesine qarama-qarsy ornatylǵany týraly 8 shildede belgili bolǵan. Ol áleýmettik jeli paıdalanýshylarynyń birden qyzyǵýshylyǵyn týdyrǵan. Tıin shamamen 9 aıdaı sol jerde turatyn bolady.
Nysannyń avtory - Aleks Rınsler esimdi ulybrıtanııalyq sýretshi. Onyń jumystary qalaǵa jańa reńk berip, turǵyndardyń kóńilin aýdarýǵa arnalǵan.
