Almatydaǵy «Altyn orda» bazarynda birqatar zań buzýshylyqtar anyqtaldy

ASTANA. QazAqparat - Almaty oblysy boıynsha Memlekettik kirister departamenti maýsym aıynda «ALTYN ORDA NEW COMPANY» JShS-de hronometrajdyq zertteý júrgizdi, dep habarlaıdy QR QM Memlekettik kirister komıtetiniń baspasóz qyzmeti.

Nátıjesinde JShS 2022 jyldyń 4 toqsanyna 530,4 mln teńgeniń kirisin kórsete otyryp, qosymsha salyq eseptiligin tapsyrdy. Qosymsha eseptelgen qosylǵan qun salyǵy - 63,6 mln. tg., korporatıvti tabys salyǵy - 106,0 mln.tg. Ósimpuldy eseptemegende hronometrajdyq tekserý nátıjeleri boıynsha bıýdjetke barlyǵy 169,6 mln. teńge tústi.

Tekserý barysynda «ALTYN ORDA NEW COMPANY» JShS-de baqylaý-kassa mashınalaryn qoldanbaı aqshalaı esep aıyrysýdy júzege asyrýdyń qosymsha núkteleri anyqtaldy (bazarǵa kirý (qaqpa) jáne býhgalterııa). Tekserý nátıjeleri boıynsha qosymsha 4 baqylaý-kassa mashınasy tirkeldi.

Búgingi tańda «Altyn Orda» saýda bazarynda túsindirý jumystarynyń nátıjelerimen jeke kásipkerler retinde 742 salyq tóleýshi jáne osynsha baqylaý-kassa mashınalary erikti túrde tirkeldi.

Odan bólek, Almaty oblysy boıynsha Polıtsııa departamentiniń qyzmetkerlerimen birlesip, «Altyn orda» bazarynda kásipkerlik qyzmetti salyq organdarynda tirkeýsiz júzege asyratyn tulǵalardy anyqtaý boıynsha taqyryptyq (reıdtik) tekserý júrgizildi. Reıd barysynda 12 jeke tulǵa anyqtaldy. Materıaldary sotqa joldandy.

Budan basqa, memlekettik kirister organdarynyń qyzmetkerleri 3 salyq tóleýshiniákimshilik jaýapkershilikke tartty:

- 1 salyq tóleýshi kásipkerlik qyzmetpen aınalysqany, sondaı-aq tıisti tirkeýsiz, ruqsatsyz nemese habarlama jiberýsiz áreketterdi júzege asyrǵany úshin;

- taýardyń baǵasyn tómendetip kórsetip, atalǵan taýardy «Altyn orda» bazarynyń aýmaǵynda ótkizgen 2 tulǵa ákimshilik jaýapkershilikke tartyldy.