Almatydaǵy altyn kúz – fotoreportaj
ALMATY. QazAqparat – Kúz – molshylyqtyń, baılyqtyń, berekeniń mezgili. Arý Almatyda bul mezgil basqa maýsymdarǵa uqsamaıtyn erekshe ásemdigimen kópke belgili. Qala turǵyndary men qonaqtary bul ásemdikti, ásirese bıikten kórgendi unatady. Sondyqtan, shahar turǵyndary men qonaqtary keremet kórinisti tamashalaý úshin «Kók-Tóbe» saıabaǵyna barady. Osyǵan oraı, QazAqparattyń fototilshisi saıabaqty aralap, ádemi sátterdi sýretke túsirgen edi.
Kúz mezgili – tabıǵatty tamashalaýǵa, ádemi fotosýretter túsirýge arnalǵan keremet ýaqyt. Al, «Kók-Tóbe» saıabaǵy – tamasha ýaqyt ótkizýge taptyrmas orynnyń biri. Ol Qazaqstannyń eń kórikti ári tańǵajaıyp oryndarynyń birinen sanalady. Qalanyń eń bıik núktesi – Kók-Tóbe teńiz deńgeıinen 1100 metr joǵary.
Qala qonaqtary men turǵyndary aspaly jol arqyly áýe tramvaıymen kóterilip, taýlardyń kórinisinen lázzat alý múmkindigine ıe bolady. Bıiktikten taýlar men qalanyń kórinisi alaqandaǵydaı kórinedi. Sondaı-aq, bul jerden otbasymen birge serýendep júrgen adamdardy, týrısterdi, jastar men ǵashyqtardy, tańnyń atýy men kúnniń batýyn tamashalaıtyn jandardy taba alasyz.
Aıta keteıik, bul kúnderi Almaty qalasynda túngi jáne tańǵy ýaqyttarda aýa raıy salqyn bolsa da, kúndiz aspan ashyq, kún jyly. Eger qazan aıynyń alǵashqy jartysynda azdaǵan jańbyr baıqalsa, aıdyń ekinshi jartysynda aýa raıy birshama ózgerip, kún saıyn derlik jaýyn-shashyn bolyp jatyr dese bolady.
