Almatydaǵy áleýmettik-medıtsınalyq mekemelerde birqatar óreskel zań buzýshylyqtar anyqtaldy
ALMATY. Maýsymnyń 24-i. QazAqparat /Erlik Erjanuly/ - Almatyda múgedekter men qarttardyń quqyqtaryn qorǵaýǵa baǵyttalǵan zańnamanyń qoldanylýyna júrgizilgen tekserý kezinde 159 zań buzýshylyqtar anyqtaldy. Bul búgin Almatyda ótken qalalalyq prokýratýranyń alqa májilisinde aıtyldy,
dep habarlaıdy QazAqparat.
«Prokýratýralyq tekserý kezinde jergilikti atqarýshy jáne ýákiletti oryndar tarapynan óreskel zań buzýshylyqtarǵa jol berilgeni málim boldy. Sondaı-aq olardyń ózderine júktelgen mindetterdi tıisti dárejede oryndamaı, múgedekterdiń quqyqtaryna nuqsan kelgeni anyqtaldy. Olar - múliktik quqyqtardyń buzylýy, qamqorshy nemese qorǵanshy quqyqtaryn teris paıdalaný, múlikterin zańsyz ıeliginen shyǵarý, memlekettik satyp alý týraly zań buzýshylyqtar, ruqsatsyz áleýmettik is-sharalarmen aınalysý jáne taǵy basqalar», deıdi aǵa prokýror Aman Aıashanov. Onyń aıtýynsha, múgedekterge arnalǵan ınternattarda 116 adamǵa áleýmettik tólemder alý úshin esep-shot ashylmaǵan. Demeýshiler arqyly túsken materıaldyq qundylyqtardyń ornynda bolmaý faktileri de oryn alyp otyr. Jumyspen qamtý jáne áleýmettik baǵdarlamalar basqarmasy 54 múgedekke arnalǵan arbalar berilmeı, olardyń konstıtýtsııalyq quqytary buzylǵan.
«Qamqorshy nemese qorǵanshy quqyqtaryn teris paıdalanýǵa baılanysty qozǵalǵan 2 qylmystyq istiń qazirgi kezde bireýi sotqa jiberilse, ekinshisine tergeý amaldary júrgizilýde. Jalpy tekserý qorytyndysy kezinde barlyǵy 159 zań buzýshylyq anyqtalyp, ony joıý týraly 20 usynys engizildi. Sonymen qatar 34 adam tártiptik, 14 adam ákimshilik jaýapkershilikke tartylyp 223 myń 264 teńge kóleminde aıyppul salyndy. Búgingi tańda onyń 124 myń 354 teńgesi óndirilip alyndy», deıdi Aman Aıashanov.
