Almatydaǵy Alataý aýdanynda 500 oryndyq jańa meshit ashyldy
ALMATY. QazAqparat - Búgin Almaty qalasynyń Alataý aýdanyndaǵy «Darhan» yqsham aýdanynda 500 oryndyq jańa meshit ashyldy. Alla úıiniń saltanatty ashylý rásimine Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly, Alataý aýdanynyń ákimi Baǵdat Mánizorov, sondaı-aq, ımamdar, medrese shákirtteri jáne jergilikti turǵyndar qatysty.
«Allaǵa shúkir, qazirgi tańda Qazaqstannyń barlyq jerinde osyndaı meshitter salynyp, halyqtyń ıgiligine berilip jatyr. Meshit halyqty yntymaqqa, birlikke, baýyrmaldyqqa, ımandylyqqa shaqyrady. Sondyqtan, osyndaı meshitter el óńirlerinde kóptep ashyla bersin», - dedi óz sózinde Bas múftı Erjan qajy Malǵajyuly.
Óz kezeginde aýdan ákimi Baǵdat Mánizorov aýdanda osymen 11-shi meshittiń paıdalanýǵa berilgenin jetkizdi.
«Darhan» yqsham aýdanynda turatyn azamattardyń demeýshiligimen mine osyndaı záýlim meshit halyqtyń ıgiligine berilip otyr. Munyń barlyǵy táýelsizdigimizdiń arqasynda qol jetkizilip jatqan dúnıe. Táýelsizdigimizge bıyl 25 jyl tolyp otyr. Kúni búginge deıin Almaty qalasynda 48 meshit bar bolǵan bolsa, solardyń ishinde 10 meshit bizdiń aýdanda ornalasqan bolatyn. Endi mine búgin, tuńǵysh ret «Darhan» yqsham aýdanynda «Darhan» aýyldyq meshiti esigin aıqara ashty. Bul osymen 11-shi meshit. Qazir «Alǵabas», «Trýdovık» jáne «Baıbesik» yqsham aýdandarynda da jańa meshitter salynyp jatyr. Olar bıylǵy jyldyń sońynda paıdalanýǵa beriledi», - dedi aýdan ákimi.
Al «Darhan» yqsham aýdanynyń turǵyndary jańa meshittiń ashylǵanyna dán rıza bolyp, bir-birine qutty bolsyn aıtyp, ıgi tilekterin bildirip jatty.
«Alla taǵala urpaǵymyzdy qashanda ıslam dininde tolyqqandy ómir súrýge násip etsin. Dinimiz qýatty bolsyn. E Alla, elimizge yrystyq, jerimizge tynyshtyq bere gór! Jer men kókten keletin ár túrli qaýip-qaterden, jalyndaǵan ottan, daýasyz dertten saqtaı kór», - dep aǵynan jaryldy 1991 jyly Mońǵolııa jerinen kóship kelgen jergilikti aqsaqal Otaı Rahatuly.
Sondaı-aq taǵy bir jergilikti turǵyn Batyrhanova Nesiphan apa jańa meshittiń arqasynda jergilikti jastardyń dinı saýatyn ashýǵa, olardy musylmandyqqa tárbıelýge zor múmkindik týatyndyǵyn aıtty.
«Meshittiń ashylýy biz úshin úlken qýanysh qoı. Endi jańa meshittiń jamaǵaty da ıgiligi de kóp bolsyn. Bereke-birligimiz nyǵaıa bersin. Analar eshqashan da jylamasyn. Qaıta, balalarynyń ımandylǵyn, musylmandyǵyn kórýge násip etsin. Táýelsizdigimiz, beıbitshiligimiz máńgilik bolsyn», - dedi ol.
Aıta ketelik, Alataý aýdany budan 8 jyl buryn ashylǵan bolatyn. Qaladaǵy jas aýdandardyń biri. Al búgin ashylǵan «Darhan» aýyldyq meshiti Qazaqstan musylmandary dinı basqarmasynyń tizilimine engizilgen. Búgin Bas múftıdiń buıryǵymen 1974 jyly týǵan Bekmaǵambetov Temirbek esimdi naıb ımam «Darhan» aýyldyq meshitiniń bas ımamy bolyp bekitildi. Ol Almatydaǵy «Nur Múbárak» ýnıversıtetiniń túlegi. Mysyr jáne Pákistan elderinde tájirıbeden ótken. Sońǵy 4 jyl boıy óziniń týǵan qalasy Kókshetaýdaǵy Naýan Haziret ortalyq meshitinde naıb ımam bolyp qyzmet atqaryp kelgen.
