Almatydaǵy Alataý aýdany qurylǵanynyń 4 jyldyǵyn atap ótýde

 Almaty ákimi Ahmetjan Esimov «Saq qorǵandary» aýmaǵynda ótken merekelik sharalarǵa qatysty, dep habarlady qala ákiminiń baspasóz qyzmeti.

Qala basshysy tórt jyl ishinde aýdannyń áleýmettik jáne ekonomıkalyq damýy barysynda kóptegen jumystar atqyrlǵanyn atap ótti.

«El Prezıdentiniń tapsyrýy boıynsha Alataý aýdanynyń ınfraqurylymyn damytý úshin respýblıkalyq jáne qalalyq bıýdjetten 70 mlrd. teńgege jýyq qarjy bólindi. Bolashaqta aýdanda kishi jáne orta bıznestiń keń qanat jaıatyndyǵyna, megapolıs pen respýblıka kóleminde mańyzy bar jańa nysandardyń kóptep salynatyndyǵyna men senimdimin»,-dep atap ótti Ahmetjan Esimov.

Ol sonymen qatar qala bıýdjetine túsetin salyqtyń 3 paıyzyn Alataý aýdany beretindigin de jetkizdi. Josparlanǵan nysandar salynǵan soń bul san odan ári ósetin bolady. Aýdannyń basty baǵyttarynyń biri- ındýstrıalyq aımaqty qurý, sonda jańadan 110 kásiporyn paıda bolyp, 20 myń jańa jumys orny ashylady.

Budan ózge, Alataý aýdanynda 5 mln. sharshy metr turǵyn úı salý josparlanýda. «Qyzyl jıekke» ornalasqan turǵyndar bolashaqta osy úılerge kóshiriletin bolady.

Zańsyz basyp alynǵan jerler zańdastyrylýda. Búgingi kúnge deıin 5 myńnan astam zańsyz jerdiń 4 myńy tirkeýden ótti. Bıyl Alataý aýdanynda jańa HQKO men stýdenttik qalashyqtyń qurylysy bastalady.

«Almatydaǵy Mádenıet jyly» aıasynda Alataý aýdanynda 1 myń oryndyq kınokontsert zaly men 15 myń adam sııatyn Sport saraıy salynbaq.

Esterińizge sala ketsek, Qazaqstan Respýblıkasy Prezıdentiniń Jarlyǵymen 2008 jyldyń maýsym aıynda qala mańyndaǵy 20 kenttiń Almatyǵa qosylýy nátıjesinde qalanyń jetinshi Alataý aýdany paıda bolǵan-dy. Osylaısha, qala endi eki baǵytta damı bastady - soltústik jáne soltústik batys. Jerdi basyp alý, jón-jozyqsyz úı salý isteri de retke keltirildi.

Jarty jyldyń ishinde Alataý aýdanynda memlekettik qyzmet kórsetý qurylymy paıda bolyp, naqtyly statıstıka qalyptasty.

Qazirgi kezde Alataý aýdanyndaǵy 18 móltekaýdanda 170 myń turǵyn ómir súrip, eńbek etýde.