Almatydaǵy ál-Farabı dańǵylyndaǵy kópir qashan paılanýǵa beriledi
ALMATY. QazAqparat - Almatyda ál-Farabı dańǵyly boıyndaǵy Esentaı ózeni arqyly ótetin kópirdi qalpyna keltirý jumystary jalǵasýda, dep habarlaıdy QazAqparat tilshisi.
Qalalyq mobıldilik basqarmasynyń basshysy Saǵyndyq Telibaevtyń aıtýynsha, kópirde qaıta jóndeý jumystaryn bastamas buryn 2022 jyly arnaıy zertteý júrgizilgen.
«Zertteýler kópir qurylymynyń apatty jaǵdaıda ekenin kórsetti. Mundaǵy tirekterdiń qısaıýy shamamen 15 sm quraıdy, soǵan baılanysty oqý maýsymy aıaqtalǵan soń kópirdi qaıta jóndeý jumystary bastaldy, 1 qyrkúıekke deıin jumysty aıaqtaýdy josparlap otyrmyz», - dedi ol.
Kópir qurylymyn qaıta qurý úsh kezeńde júzege asyrylady, kópirde barlyǵy 96 tirek bar, búginde 27-si aýystyryldy.
«Aptanyń sońynda tirekterdi ornatý jumystary júrgizilgen ýchaskede kólik qozǵalysyn ashamyz. Búgingi tańda asfaltbeton jabyndysyn gıdrooqshaýlaý jáne tóseý úshin tegisteý jumystary júrgizilýde. Apta sońynda kópir qurylymynyń osy bóliginde kólik qozǵalysyn ashýdy josparlap otyrmyz, sodan keıin kópirdiń ortasy jabylyp, eki jaqtan qozǵalys eki jolaqpen uıymdastyrylady», - dep túsindirdi spıker.
Sonymen qatar, bul nysanda jaıaý júrginshilerge arnalǵan jer ústi ótkeliniń qurylysy qarastyrylǵan.
«Buǵan deıin bul ýchaskede jer ústi jaıaý júrginshiler ótkeli bolmaǵan, adamdar kólikterge arnalǵan kópir arqyly joldy kesip ótetin. Bul jaıaý júrginshiler úshin úlken qaýip tóndirdi, óıtkeni ál-Farabı dańǵylynyń boıyndaǵy jyldamdyq saǵatyna 80 shaqyrym. Kópirdi qalpyna keltirý jumystary aıaqtalǵannan keıin jaıaý júrginshiler bólek júretin bolady», - dep qosty Saǵyndyq Telibaev.
Basqarma basshysy Esentaı ózeni arqyly ótetin avtomobıl kópiri eki baǵytta 8 jolaqtyǵa deıin keńeıtiletinin aıtty - árqaısysy tórt jolaqty bolady. Buryn kópir úsh jolaqty edi.
«Bul kólik qozǵalysyn jaqsartý úshin jasaldy, óıtkeni bul kópirde tańǵy jáne keshki ýaqytta keptelis paıda bolady. Kópir qurylymynyń uzyndyǵy 43 metr, eni 33 metr», - dedi ol.
Buǵan deıin Almaty ákimi Erbolat Dosaev halyqpen kezdesýinde ál-Farabı dańǵyly boıyndaǵy Esentaı ózeni arqyly ótetin kópirdiń keńeıtiletinin málimdegen bolatyn. Odan keıin munda eki jaǵynan jaıaý júrginshiler kópirleri men erekshe qajettilikteri bar adamdarǵa arnalǵan pandýstar salynatynyn habarlady.
6 maýsymnan bastap Esentaı ózeni arqyly ótetin kópirde kólik qozǵalysy shekteldi.
Jaqynda Erbolat Dosaev ál-Farabı dańǵylynyń boıyndaǵy Esentaı ózeni arqyly ótetin kópirdi keńeıtý jumystary nelikten túngi ýaqytta júrgizilmeıtinin túsindirdi.
Onyń aıtýynsha, bul jumys sapasyna áser etýi múmkin.
