Almatydaǵy ál-Farabı dańǵylynda keri jáne eki jolaqty qozǵalys uıymdastyryldy
ALMATY. QazAqparat - Jóndeý jumystaryn júrgizý kezinde ál-Farabı dańǵyly boıynsha jol qozǵalysy uıymdastyryldy, dep habarlaıdy QazAqparat tilshisi.
Jol qozǵalysynyń qaýipsizdigin qamtamasyz etý jáne ál-Farabı dańǵylynyń boıynda Syrǵabekov kóshesinen Esentaı ózenine deıin ótkizý qabiletin arttyrý úshin 12 shildeden 13 shildege deıin mynadaı sharalar qabyldanatyn bolady:
- 12 shilde tańǵy saǵat 06:00-den bastap ál-Farabı dańǵylynyń soltústik jaǵynan Syrǵabekov kóshesinen Esentaı ózenine deıin keri qozǵalys jolymen kólik quraldaryn burý uıymdastyrylady;
- 06:00 saǵattan bastap 15:00 saǵatqa deıin shyǵys baǵytta eki jolaqty qozǵalys, batys baǵytta bir jolaqty qozǵalys uıymdastyrylady.
Saǵat 15:00-den bastap 21:00 saǵatqa deıin - batys baǵytta eki jolaqpen, shyǵys baǵytta bir jolaqpen qozǵalys júzege asady.
Táýliktiń keshki ýaqytynda saǵat 21:00-den bastap jol-kólik oqıǵalaryn boldyrmaý úshin Jarokov kóshesi boıynsha kólikti soltústik baǵytta burýdy uıymdastyra otyryp, shyǵys baǵyttaǵy qozǵalys tolyǵymen jabylatyn bolady:
«Qozǵalys qatysýshylarynyń qaýipsizdigin qamtamasyz etý úshin patrýldik 6 ekıpajy qarastyrylǵan, 40 km/saǵ. jyldamdyqty shekteý belgileri ornatylady, jolaqtar boıynsha bólý konýstyq shaǵylystyratyn chıptermen belgilenedi. Reversıv bastalǵanǵa deıin eki jaǵynan kólik aǵyndaryn bóletin metall týrnıketiniń 25 danasy bolady (100 m)» dep habarlady ákimdikten.
Ál-Farabı dańǵylyndaǵy Remızovkadan shyǵý «Esentaı-Moll» ońtústik turaq aımaǵy arqyly uıymdastyrylady. Atalǵan ýchaskede jol qozǵalysy qaýipsizdigin qamtamasyz etý úshin patrýldyń polıtsııa ekıpajy turatyn bolady.
