Almatydaǵy ál-Farabı dańǵylynda erekshe kópir salynady
ALMATY. QazAqparat - Ál-Farabı dańǵylyndaǵy eń erekshe joba - botanıkalyq baq pen jotalarda salynatyn jańa saıabaqty baılanystyratyn jasyl kópir. Bul týraly Almaty ákimdiginiń 2022 jylǵa deıingi damý jónindegi jańa tanystyrylymynda aıtyldy, dep habarlaıdy QazAqparat tilshisi.
Ákimdik málimetine súıensek, jaıaý júrginshiler kópiri jasyl jelekti qalyptastyratyn qaladaǵy jańa sımvolǵa aınalady. Kópir baqtyń jalǵasy bolady. Onyń uzyndyǵy - 350 metr, al jaıaý júrý baǵyty - shamamen bir shaqyrym.
«Qalanyń ózindik ereksheligin qalyptastyratyn jańa biregeı usynys bar. 2010 jyly ál-Farabı dańǵylynyń joǵary jaǵynda sport kesheni salyndy. Sport kesheniniń janynda Esentaı ózeni, botanıkalyq baq, ýnıversıtet, dúkender, bıznes ortalyqtar, klasterler sııaqty mańyzdy nysandar ornalasqan. Sol sebepti, sport kesheni aýmaǵynda jańa rekreatsııalyq aımaq qurý usynylady. Bul aımaq shamamen 60 gektardy quraıdy», - dep atap ótti qalalyq jasyl ekonomıka basqarmasynyń basshysy Natalıa Lıvınskaıa.
Jańa qoǵamdyq keńistikterdi jobalaý osy jyldyń sońyna deıin, iske asyrý kelesi jylǵa josparlanǵan.
Ál-Farabı dańǵylymen birge Esentaı ózeniniń kórinisi de ózgeredi. Munda kópir astyndaǵy keńistikti jáne jaǵalaý aımaǵyn abattandyratyn parkýr ornyn qurý josparlanǵan.
Ákimdiktiń aldynda Úlken Almaty ózeni arnasyn abattandyrý boıynsha mańyzdy josparlar tur.
