Almatydaǵy aqyly avtoturaqta arnaıy abonenttik tólem engizildi
ALMATY. QazAqparat - Almatydaǵy aqyly turaq qala turǵyndary úshin tólemniń yńǵaıly jolyn qarastyryp otyr. Búginnen bastap, aqyly turaqqa abonenttik tólem engizdik, dep málimdedi «Kókbazar» mańy men Respýblıka alańyndaǵy avtoturaq keńistigin iske qosýdyń tájirıbelik ýaqytyn qorytyndylaǵan «Almaty arnaıy tehparkıng qyzmeti» JShS dırektory Marat Pirinbekov.
«Aqyly turaqty maýsym aıynan bastap engizgenimiz belgili. Onyń maqsaty qaladaǵy zańsyz turaq úshin aqsha alýdy toqtatý. Basynda halyq muny qymbat kórip, qabyldaı almady. Qazirgi ýaqytta turaqtarǵa qoıylatyn kólikter sany artyp keledi. Álemdik tájirıbege súıene otyryp, biz qala turǵyndaryna jeńil bolýy úshin abonenttik tólem engizip otyrmyz. Abonenttik tólem quny 6000 teńge. Júıe dúısenbi, seısenbi, sársenbi, beısenbi, juma kúnderi saǵat tańǵy 8-den keshki 19-00-ge deıin jaramdy. Bul - óte yńǵaıly. Abonentke aldyn ala tólem jasalady. Al saǵat 19-dan keshigip jatqan jaǵdaıda, tańǵy 8:00-ge deıin tegin, aqsha tólenbeıdi. Biraq, senbi, jeksenbi kúnderi kelse, abonoment jaramaıtynyn aıtqymyz keledi. Ádettegi júrgizýshi retinde aqsha tóleıdi. Eger abonenttik kartasy joq bolsa, saǵatyna 100 teńgeden tóleıtini belgili. Aıta ketelik, eger 100 teńge tólep, bir saǵatqa kóligin tastap, keıin keshigip jatsa, sosyn ınspektorǵa tólegenin aıtyp ketip qalǵan jaǵdaıda artyq turǵan saǵaty úshin ákimshilik jazaǵa tartylady. Olar bizdiń bazada tirkeledi», - dedi Marat Pirinbekov.
Jıynda Almaty qalasy ákimshilik polıtsııasy basqarmasynyń basshysy Nurlan Almasbekov júıe iske qosylǵan 3 aıdyń ishinde 290 adam ereje buzǵanyn aıtty.
- Aqyly turaq talabyn oryndamaǵan adamǵa 3 aılyq eseptik kórsetkish boıynsha (6363 teńge) aıyppul salynady. Al eger jyl ishinde tólemese 5 AEK nemese 10 605 teńge óteıtin bolady. Osy ýaqytqa deıin 2 mln teńgege jýyq aıyppul salyndy, - dedi N.Almasbekov.
Aıta keteıik, búgingi kúni avtomattandyrylǵan biryńǵaı aqyly turaq júıesi 1000 oryndy qamtıdy. Sátbaev kóshesinde Jeltoqsan men Fýrmanov kósheleri arasynda ornalasqan Respýblıka alańyndaǵy turaq keńistigi Almatydaǵy eń úlken aqyly turaq sanalady. Bul jerge 296 kólik qoıýǵa bolady.
«Bizdiń kompanııa mamandar arqyly paıdalanýshylardyń pikiri men usynysyna turaqty monıtorıng jasaıdy. Osylaısha, bir aılyq turaq abonomenti qarjyny únemdeý men tólem jasaýdy jeńildetý úshin engizildi. Ol eń aldymen Respýblıka alańyndaǵy aqyly avtoturaqty jıi paıdalanýshylarǵa arnalǵan. Bizdiń avtoturaqtarda 20-dan astam ınspektor bar, olar 120 myń teńgeden jalaqy alady», - dedi Marat Pirimbetov.
Aılyq abonomentti aparking.kz saıty arqyly satyp alýǵa jáne smartfonǵa arnalǵan qosymshasyn júktep alýǵa bolady. Avtoturaqtyń alǵashqy 15 mınýty tegin.
