Almatydaǵy aqyly avtoturaqta 280 múgedekke qate aıyppul salynǵan
ALMATY. QazAqparat – Almatyda avtoturaqqa tólenbegen aqy úshin qatelikpen múgedekterge aıyppul salynyp ketken. Prokýratýranyń aralasýymen atalmysh jaılarǵa qatysty ákimshilik óndiris toqtatyldy, dep habarlaıdy QazAqparat tilshisi.
Almaty qalasynyń Jetisý aýdandyq prokýratýrasy QR ÁQBjK-niń 597-baby boıynsha (arnaıy sertıfıkattalǵan qurylǵymen jabdyqtalǵan orynda avtoturaq aqysynan jaltarý) qozǵalǵan ákimshilik óndiristiń zańdylyǵyn tekserip kórdi.
«Anyqtalǵanyndaı, 2019 jyly atalmysh bap boıynsha ákimshilik jaýapqa І jáne ІІ toptaǵy 287 múgedek tartylǵan. Alaıda Almaty qalasynyń aqyly avtoturaqtaryn uıymdastyrý erejeleriniń 38-shi pýnktine sáıkes (Almaty qalasy ákimdiginiń 2011 jyldyń 14 qarashasyndaǵy № 4/975 qaýlysymen bekitilgen) І jáne ІІ toptaǵy múgedekter atalmysh qujat negizinde aqyly kommýnaldyq avtoturaqtarda turaq oryndaryn tegin paıdalana alady», - delingen quzyrly vedomstvonyń habaralamasynda.
Prokýrorlyq baqylaý aktisin qaraý qorytyndysyna sáıkes, Almaty qalasynyń ákimshilik polıtsııa basqarmasy múgedektigi bar júrgizýshilerge qatysty óndiristi toqtatty.
