Almatydaǵy akademııada kýrsanttyń ólimine qatysty tekserý jalǵasyp jatyr - Nurdildá Oraz

NUR-SULTAN. QazAqparat – Almaty akademııasynda kýrsanttyń ólimine qatysty tergeý barysyn mınıstr jeke baqylaýyna aldy. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.

«Іshki ister mınıstri Erlan Turǵymbaev kýrsanttyń qaza bolýyna baılanysty keshendi tekserý júrgizilip jatqan ІІM Maqan Esbolatov atyndaǵy Almaty akademııasyna bardy. Tekseristiń aldyn ala nátıjeleri týraly vedomstvo basshysyna arnaıy toptyń basshysy – ІІM Kadr saıasaty departamentiniń bastyǵy Aıdar Saıtbekov baıandady.

Onyń aıtýynsha, oqý ornynyń turmystyq jaǵdaıy, materıaldyq-tehnıkalyq jabdyqtalýy ǵana emes, oqytýshylar men kýrsanttar arasyndaǵy moraldyq-psıhologııalyq ahýal da zerdelenip jatyr. Qazirgi ýaqytta júıeli aqsha jınaýdy kórsetetin óreskel buzýshylyqtar anyqtalmaǵan. Sonymen qatar, kýrsanttar týystarynyń oqý orny qabyrǵasyndaǵy qysym týraly habarlamalary da muqııat qaralýda», - dedi N. Oraz onlaın brıfıngide.

Óz kezeginde ІІM Kadr saıasaty departamentiniń bastyǵy Aıdar Saıtbekov kýrsant ólimine qatysty keshendi tekserý barysynda áleýmettik zertteý júrgizilgenin atap ótti.

«Osy oraıda Ótegenov óziniń kýrstastarynan túrli somada jıi qaryz alǵany, sondaı-aq býkmekerlik kontorada onlaın aqsha tikkeni anyqtaldy. Qazirgi kezde ata-anasynyń ýáji, sondaı-aq akademııadaǵy oqý-tárbıe protsesi, ujymdaǵy moraldyq-psıhologııalyq jaǵdaı tekserilip jatyr. Jalpy tekseris barysyn mınıstr jeke baqylaýyna aldy. Ol akademııaǵa baryp, Ótegenovtyń qatarlastarymen, oqytýshylar quramymen kezdesti», - dedi A. Saıtbekov.

Esterińizge sala keteıik, Maqan Esbolatov atyndaǵy ІІM Almaty akademııasynyń kýrsanty Salamat Ótegenovtiń qaza tabýyna baılanysty Almaty qalasynyń Polıtsııa departamenti QR QK-niń 105-baby (óz-ózine qol jumsaýǵa jetkizý) boıynsha sotqa deıingi tergeý júrgizilip jatyr.

Kýrsanttyń óliminen keıin Almaty akademııasynyń bastyǵy qyzmetinen bosatyldy.