Almatydaǵy Á. Qasteev mýzeıinde vaktsına salý orny ashyldy
ALMATY.QazAqparat – Vaktsınatsııa kabıneti óner murajaıynyń birinshi qabatynda ornalasqan, dep habarlaıdy QazAqparat tilshisi.
Á. Qasteev atyndaǵy óner murajaıynda Almaty qalasynyń № 12 emhanasynan mobıldi egý pýnkti ashyldy. Emhananyń bas dárigeriniń mindetin atqarýshy Toǵjan Ábildaeva olardyń vaktsınatsııa pýnkti de basqalar sııaqty saǵat 8.00-den 20.00-ge deıin jumys isteıtinin aıtty.
«Vaktsınatsııadan keıin patsıentter «Óner» kórme pavılonynyń ekinshi qabatyna kútý úshin ótedi, onda dárigerdiń baqylaýymen 30 mınýt ótkizý qajet. Bul kezde kóńilge jaǵymdy dúnıe men paıdalyny biriktirýge bolady», - deıdi Toǵjan Ábildaeva.
Atalǵan egý pýnkti «Kóktem-3» shaǵynaýdanynda ornalasqan. Bólmeler sanıtarlyq normalarǵa sáıkes jabdyqtaldy. Kútý zaldarynda jáne vaktsınadan keıingi aımaqta áleýmettik qashyqtyq saqtalǵan. Ózimen birge jeke kýálik bolýy tıis.
Vaktsınatsııa alǵandardyń qatarynda qala turǵyny Shámsha Ájibaeva bar.Ol ekpeden keıingi áserimen bólisti.
«Qazir BAQ men ınternette vaktsınatsııa týraly jıi aıtylyp ta, jazylyp ta júr. Men aýyryp qalmaý úshin vaktsına alýdy jón sanadym, árqaısymyzdyń úıimizde týǵan-týystarymyz, balalarymyz kútip otyr, olarǵa qaýip tóndirgim kelmeıdi», - deıdi almatylyq Shámsha Ájibaeva.
Aıta keteıik, qazir qalada 200-den astam vaktsına egý pýnktteri bar. Halyqtyń barlyq toptary úshin koronavırýs ınfektsııasyna qarsy ekpe tegin júrgiziledi.
