Almatydaǵy 9 qabatty úıde bolǵan órt kezinde úsh páterdiń balkony janyp ketti
ALMATY. QazAqparat - Almatydaǵy 9 qabatty úıdiń órtenýine baılanysty qosymsha málimet belgili boldy, dep habarlaıdy QazAqparat tilshisi.
Qalalyq TJD baspasóz hatshysy Sandýǵash Baımuhambetovanyń aıtýynsha, 9 qabatty úıdiń 6-7-8 qabattaryndaǵy páterlerdiń balkondary órtendi. Sondaı-aq, jalyn úıdiń qasbetin zaqymdap, barlyǵy 50 sharshy metr aýmaqty sharpyǵan.
«Órt sóndirýshiler arnaıy apparatty paıdalana otyryp, úıdegi barlyq adamdardy alyp shyqty. Barlyǵy 50 adam qaýipsiz jerge shyǵaryldy», - dedi S.Baımuhambetova.
Aıta ketý kerek, Qabanbaı 138 mekenjaıy boıynsha páter órtenip jatqany týraly habarlama saǵat 13:25-te túsken. Órt sóndirýshiler oqıǵa ornyna saǵat 13:33-te jetti.
Júrgizilgen sharalardyń arqasynda órtti saǵat 13:58-de aýyzdyqtap, 14:08-de óshirý múmkin boldy.
