Almatydaǵy 600 beınekameraǵa jasandy ıntellekt ornatylǵan
Almaty qalalyq Polıtsııa departamentiniń málimetinshe, beınekameralardy paıdalaný qylmystyń azaıýyna yqpal etti.
«Búginde polıtsııa 4 myń beınebaqylaý kameralary kómegimen qaladaǵy zańdylyq pen tártipti baqylaıdy, olardyń 600-i jasandy ıntellektpen qamtamasyz etilgen jáne buzýshylyqtardy adamnyń qatysýynsyz ózderi tirkeıdi. Kamera izdeýde júrgen adamdy nemese jalǵan memlekettik tirkeý nómirleri bar avtokólikti anyqtaı alady. Olardyń kómegimen jyl basynan beri bir myń 400 qylmystyń beti ashyldy, 780 myń ákimshilik quqyq buzýshylyq anyqtaldy», – dedi Almaty qalalyq Polıtsııa departamentiniń basshysy Qanat Taımerdenov.
Onyń aıtýynsha, Almaty qalasyn damytý jónindegi baǵdarlama aıasynda tártip saqshylary qalanyń barlyq nysandaryndaǵy beınekameralardyń derekterine qol jetkize alady.
«Saýda úıleri, aýrýhanalar, emhanalar, mektepter, bir sózben aıtqanda, azamattar jappaı baratyn oryndarda kamera ornatyldy. Osylaısha, biz qalada 100 myń beınebaqylaý kameralary arqyly tártipti saqtaýǵa múmkindik alamyz. Biz dál osy aldyn-alý sharalary jalpy qylmystyń azaıýyna oń áser etkenine senimdimiz. Bizdiń qala turǵyndar men qonaqtar úshin qaýipsiz boldy. Sondyqtan biz osy baǵytta jumys jasaı beremiz», – dep qorytyndylady Qanat Taımerdenov.