Almatydaǵy 5 metrlik «sýburqaqqa» qatysty kommýnaldyq qyzmet túsinikteme berdi

ALMATY. QazAqparat - Almatyda kommýnaldyq qyzmet ókilderi Momyshuly kóshesindegi 5 metrlik sýburqaqqa qatysty túsinikteme berdi, dep habarlaıdy QazAqparat tilshisi.

Tótenshe jaǵdaıdyń vıdeosy Instagram jelisiniń kris_p_almaty pablıginde jarııalandy. 5-6 metrlik sýburqaq Momyshuly Rysqulov kósheleriniń qıylysynda bolǵan. 

Atalǵan tótenshe jaǵdaıǵa baılanysty «Almaty sý» holdınginiń resmı ókili Serik Shaǵyrov túsinikteme berdi.

Onyń aıtýynsha, ol jerde apat bolmaǵan.

«Keshe Alataý aýdany qubyrlarynda josparly jumys júrgizilgen bolatyn. Biz bul jumystar týraly juma kúni BAQ arqyly habarlaǵan bolatynbyz. Jylý maýsymyna daıyndyq retinde zaporly armatýra aýystyryldy. Keshe tańǵy 8-den búgin tańǵy 8-ge deıin Alǵabas, Aqqent, Aqbulaq shaǵynaýdandarynda sýyq sý berý toqtatyldy. Búgin jumys bitken soń sý qubyrlaryn retteý boıynsha jumys júrgizildi. Bul sýburqaq - apatty jaǵdaı emes, órt gıdrantynan aýa shyǵarý», - dedi «Almaty sý» holdınginiń resmı ókili Serik Shaǵyrov.

Onyń aıtýynsha, kommýnaldyq qyzmet ókilderi 8-14 qabatty úılerdiń joǵary qabatyna sý jetýi qıyndaǵan soń qysymdy azaıtý úshin órt gıdrantynan aýa shyǵarǵan.