Almatydaǵy 40 bazar tolyq qaıta qurýdy qajet etedi
ALMATY. 10 shilde. QazAqparat - Almatyda 74 ámbebap bazardyń 34-i tolyq nemese belgili bir bóligi «Qyzyl jıek» aýmaǵynda tur.
Qalalyq sáýlet jáne qala qurylysy basqarmasy bastyǵynyń birinshi orynbasary Janat Aıtileý búgin buqaralyq aqparat quraldary ókilderin «Stroı Sıtı» bazary aýmaǵyndaǵy saýda ortalyǵynyń 2-kezeńi qurylysynyń barysymen tanystyrǵan kezde osylaı aıtty.
«Tolyqtaı «qyzyl jıekte» turǵan bazarlar túgel joıylady. Al belgili bir bóligi ǵana turǵandar bul jerdi bosatyp, óz aýmaǵynda salynatyn jańa saýda ortalyǵyna kóshiriledi. Ázirge joıylǵan bazarlar joq. «Qyzyl jıek» aýmaǵyndaǵy jerdi bosatý týraly 6 bazar boıynsha sot sheshimi shyǵarylǵan. Endi onyń oryndalýyn zań boıynsha sot oryndaýshylary júzege asyrady», - deıdi J. Aıtileý.
Onyń aıtýynsha, tolyqtaı «qyzyl jıekte» turǵan bazarlar kaıda kóshetinin ózderi sheshedi. Jalpy Almaty qalasynyń Bas jospary boıynsha Úlken Almaty sý arnasy aýmaǵynda saýda ortalyqtaryn, ónerkásip nysandaryn salý múmkindigi qarastyrylǵan. Ázirge ol jerler Almaty oblysy aýmaǵynda. Almatynyń
Bas sáýletshisi orynbasarynyń sózine qaraǵanda, qazirgi tańda 6 bazar basshylyǵy qazirgi zamanǵy jańa saýda ortalyǵyn salýdyń syzbalyq josparyn usyndy. 13-i óz bazarlaryn qaıta qurý jumystaryn bastap, jobalaý jumysyna kiristi. Aǵymdaǵy jyly jobalar maquldansa, 2-3 bazarda jańa saýda ortalyqtarynyń qurylysyn bastaý josparlanyp otyr.
