Almatydaǵy 3 jolaıryqtyń qurylysy qashan aıaqtalatyny belgili boldy

ALMATY. QazAqparat – Almatyda 3 jolaıryqtyń qurylysy qolǵa alyndy. Buqtyrma kóshesi-Qulja kúre joly, Seıfýllın dańǵyly-Jansúgirov kóshesi jáne Saın kóshesi-Móńke bı kóshesiniń qıylysynda. Qalalyq mobıldilik basqarmasynyń basshysy Ǵanı Myrzahanov nysandardyń qashan salynyp bitetini týraly aıtty, dep habarlaıdy QazAqparat tilshisi.

Buqtyrma kóshesi men Qulja kúre joly qıylysyndaǵy jolaıryqtyń qurylysy belgilengen kestege sáıkes júrgizilip jatyr.

«Qala jáne oblys aýmaǵynda ornalasqan qajetti jer telimderin satyp alý tolyǵymen aıaqtaldy. Birinshi jarty jyldyqtyń sońyna deıin estakada men burylys joldaryn salý boıynsha qurylys jumystaryn aıaqtap, kóliktiń barlyq baǵyttaǵy qozǵalysyn qamtamasyz etý josparlanyp otyr», - deıdi Ǵanı Myrzahanov.

Seıfýllın dańǵyly men Jansúgirov kóshesiniń qıylysyndaǵy jolaıryq qurylysy kelesi jylǵa deıin sozylýy múmkin. Degenmen, kólik qozǵalysy bıyl jyl sońynda ashylady degen jospar bar.

«Búgingi kúnge áli de 7 jer telimi satyp alynǵan joq. Bul jer telimderi boıynsha sot resimderi júrgizilip jatyr. Qurylys jumystary osy jer telimderin satyp alýǵa qaraı oryndalady. Kólik qozǵalysyn ashý osy jyldyń aıaǵyna, al tolyǵymen aıaqtalýy 2023 jylǵa josparlanǵan», - dedi ol.

Al, Saın men Móńke bı kósheleriniń qıylysyndaǵy jolaıryq qurylysy jobasyna túzetýler engizilmek. Jumystardy tolyq aıaqtaý 2023 jylǵa kózdelip otyr.

Eske sala ketsek, Almatynyń taýly aýdandarynda qurylysqa tyıym salynbaq.