Almatydaǵy 3 jolaıryq qurylysy qashan aıaqtalady
ALMATY. QazAqparat - Almaty ákimi Baqytjan Saǵyntaev «Almaty» telearnasyndaǵy tikeleı efırde salynyp jatqan úsh jolaıryǵy týraly aıtty, dep habarlaıdy QazAqparat tilshisi.
Buqtyrma kóshesi - Qulja tasjoly boıyndaǵy jolaıryqtyń qurylysy irgeles ornalasqan shaǵyn aýdandar men 300 myńǵa jýyq turǵyny bar Almaty oblysynyń qala mańyndaǵy eldi mekenderin qalanyń ortalyq bóligine jáne Almaty halyqaralyq áýejaıyna qoljetimdi etýge baǵyttalǵan.
Jolaıryǵynyń qurylysy Qulja traktisiniń kólik ótkizý qabiletin táýligine 77 myń kólikke deıin arttyrady, al Buqtyrma kóshesindegi kólik qozǵalysy táýligine 60 myńǵa deıin ulǵaıady.
Joba boıynsha Buqtyrma kóshesi boıyna (570 m) týnneldi bóligi bar úsh deńgeıli jolaıryǵyn, Qulja traktisi boıyna (783 m) estakadasy bar úsh jolaqty jáne olardyń qıylysynda aınalmaly qozǵalysty qamtamasyz etetin kireberisterdi salý qarastyrylǵan.
Bıyl jekelegen kireberister men baǵyttar boıynsha kólik qozǵalysyn ishinara ashý josparda. Kelesi jyly qurylys tolyq aıaqtalady.
Seıfýllın dańǵyly – Jansúgirov kóshesiniń qıylysynda týnnel túrindegi jolaıryǵy salynýda. Joba boıynsha Seıfýllın dańǵyly boıymen kóliktiń kedergisiz júrýine arnalǵan jalpy uzyndyǵy 690 metrlik eki týnnel salý qarastyrylǵan.
Jansúgirov kóshesi boıynda jáne kire beristegi kólik qozǵalysy jer deńgeıinde ótedi. Sondaı-aq, 4 jer ústi jaıaý júrginshi ótkeliniń, trotýarlardyń qurylysy, aýmaqty abattandyrý jáne kógaldandyrý jumystary qarastyrylǵan.
Jolaıryqtarynyń qurylysy qazirdiń ózinde aıaqtalǵan Nazarbaev dańǵylyn temirjol boıymen ótetin estakadamen birge Soltústik-Ońtústik kólik aǵyndaryn bólýge múmkindik beredi. Seıfýllın dańǵylynyń ótkizý qabileti táýligine 65 myń kólikti, Jansúgirov kóshesinde táýligine 76 myń kólikti ótkizetin bolady. Jobany aıaqtaý 2021 jyldyń jeltoqsanyna josparlanǵan.
Rysqulov dańǵyly – Emtsov kóshesi boıyndaǵy jolaıryǵy kire berister men baǵytttar bar Rysqulov dańǵyly arqyly ótetin kópirdi qamtıdy. Estakadanyń uzyndyǵy – 186 metr. Jer ústi jaıaý júrginshiler ótkeliniń qurylysy qarastyrylǵan.
