Almatydaǵy №1-shi perzenthanaǵa zamanaýı dıagnostıkalyq qural-jabdyq syıǵa tartyldy
ALMATY. 12 sáýir. QazAqparat /Názıra Eleýhan/ - Búgin Almatydaǵy №1-shi perzenthanaǵa «Merı Keı» kompanııasy týa bitti júrek aqaýyn anyqtaıtyn «ÝDZ-skaner DC-3, Mindray» zamanaýı dıagnostıkalyq qural-jabdyqty syıǵa tartty.
Medıtsınalyq jabdyq arnaıy kardıologııalyq datchıktermen jaraqtandyrylǵan. Ol ana qursaǵyndaǵy sábıdiń de, jańa týǵan balanyń da boıynda týa bitti júrek aqaýy bar-joǵyn anyqtaýǵa múmkindik beredi.
Atalmysh shara «Merı Keı» kompanııasy men «DOM» qoǵamdyq qorynyń «Qazaqstandaǵy týa bitti júrek aqaýy bar balalardyń shetineýin azaıtý» baǵdarlamasy aıasynda jasalýda. Bunymen qatar, osy baǵdarlama aıasynda atalmysh jabdyqtarda jumys isteý úshin perzenthananyń eki mamany Túrkııa klınıkasynda tegin bilim alyp keldi.
«Qazaqstanda jyl saıyn 3000 sábı týa bitti júrek aqaýymen týylady, olardyń 10-15 paıyzy ǵana bir jasqa deıin ómir súredi. TMD elderinde jylyna 40 myń bala týa bitti júrek aqaýymen dúnıege keledi. Búginde bul másele óz elimizben qatar, álemde de úlken, ózekti problemalardyń birine aınaldy», -dep atap ótti Ulttyq pedıatrııa jáne balalar hırýrgııasy ǵylymı ortalyǵynyń aǵa ǵylymı qyzmetkeri Gúljan ársenbaeva.
Onyń aıtýynsha, týa bitti júrek aqaýy bar balalardyń shetineýin aldyn alýǵa - der kezinde dıagnostıkalaý, aqaýlardy der kezinde túzetý men mamandandyrylǵan klınıkalar jaǵdaıynda týylǵannan keıin kútim jasaý yqpal etpek. «Osy jaǵdaıda ǵana týa bitti júrek aqaýlarynyń kópshiligin emdep jazýǵa bolady. Patsıentterdiń kópshiligi em qabyldaǵannan keıin tolyqqandy saý ómir súre alady, tipti sportpen de shuǵyldana alady»,-dedi ol.
Onyń pikirinshe, bosanǵanǵa deıingi dıagnostıka - kóp máselelerdiń aldyn alady. «Eger qusaqtaǵy baladan júrek aqaýy tabylǵan jaǵdaıda aıaǵy aýyr analarǵa psıhologııalyq kómek kórsetiledi. Mundaı jaǵdaıda ne isteý kerek ekendigi aıtylady. Dárigerler de júrek aqaýynyń qandaı túri ekendigin bilýge múmkindik beredi. Eń mańyzdysy aqaýdy der kezinde dıagnostıkalaý - árbir sábıge kómek kórsetýdiń birlesken strategııasyn jasaýǵa, qazaqstandyq balalardyń shetineý deńgeıin tómendetýge yqpal etedi»,-dedi Gúljan Sársenbaeva.
№1 perzenthananyń reanımatsııa bóliminiń meńgerýshisi Sulýshash Sasaevanyń aıtýynsha jabdyqtardyń der kezinde berilýi men júrek aqaýy bar balalardyń shetineýin azaıtý baǵdarlamasy boıynsha jasalǵan qadamdar jaǵdaıdyń ózgerýine yqpal etpek. «2010 jyly bizdiń perzenthanada 6000 áıel bosandy. Onyń ishinde týa bitti júrek aqaýymen dúnıege kelgen sábıler boldy, ókinishke oraı, ol balalardan aıyrylyp qaldyq. 2011 jyldyń birinshi toqsanynda bul aýrýdyń túri tórtinshi oryndy alyp otyr. Osy ýaqyt aralyǵynda 10 baladan júrek aqaýy anyqtaldy. Sondyqtan aldan-ala dıagnostıkalaý óte qajet jáne ol bárine qoljetimdi bolýy kerek. Biz sondyqtan perzenthanada aldaǵy ýaqytta birińǵaı dıagnostıkalyq ortalyq qurýdy josparlap otyrmyz. Onda dıagnostıka jasaý tegin bolady»,-dedi ol.
