Almatyda jymqyrylǵan memlekettik qarajattyń tórtten bir bóligi qaıtarylǵan
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi Ulttyq bıýrosynyń Almaty qalasy boıynsha departamentiniń basshysy Erjan Ibraımov baspasóz máslıhaty barysynda vedomstvonyń jumys qorytyndysy týraly aıtyp berdi, dep habarlaıdy QazAqparat tilshisi.
«Sybaılas jemqorlyqqa qarsy kúres boıynsha Ulttyq bıýronyń aldynda búgingi tańda birshama mańyzdy mindetter tur. Birinshiden, jemqorlyqqa qatysty quqyqbuzýshylyq jasaǵany úshin jazany mindetti túrde qoldaný qaǵıdatyn tolyqqandy qamtamasyz etý kerek. Ekinshiden, jemqorlyqqa qatysty quqyqbuzýshylyqtar men qylmystardyń preferentsııasy. Qazirgi tańda biz kez kelgen jemqorlyqqa qatysty qylmysty anyqtaýǵa qaýqarymyz bar. Osy maqsat úshin qajetti barlyq uıymdastyrýshylyq jáne quqyqtyq sharttar jasaldy. Esep berip otyrǵan kezeńde zańsyz ıemdengen 660 mln teńgeniń ishinde qylmystyq isterdiń aıaqtalýy boıynsha 168 mln teńge qaıtarylyp, memlekettiń tárkilengen múlikter kirisine aýdaryldy», - dedi Erjan Ibraımov.
Sonymen qatar, qylmystyq isterdi tergeý jumysynyń basty mindetteriniń biri - aldaǵy ýaqytta ondaı jaǵdaılar tirkelmes úshin quqyqbuzýshylyqtardyń sebebin anyqtaý jáne joıý bolyp tabylady.
Departament basshysynyń aıtýynsha, Memlekettik qyzmet isteri boıynsha departament pen «Atameken» kásipkerler palatasy birlesip, memlekettik organdarda jemqorlyq jaǵdaıynyń aldyn alý baǵytynda jumys júrgizýde.
«Esep berip otyrǵan kezeńde memlekettik organdar men uıymdarda jemqorlyqtyń aldyn alý baǵytynda 10 semınar-keńes ótkizildi», - dep aqparat berdi Erjan Ibraımov.
