Almatyda jylytý maýsymy merziminen buryn bastalady

ALMATY. QazAqparat - Almatyda 2 qazan kúni 2021-2022 jyldardaǵy jylytý maýsymy bastalady, dep habarlaıdy QazAqparat tilshisi.

Qala ákimi Baqytjan Saǵyntaevtyń tapsyrmasyna sáıkes, jylytý maýsymy qolaısyz meteorologııalyq boljamdar men Almatydaǵy aýa raıynyń kún saıynǵy monıtorıngine baılanysty merziminen buryn bastalatyn boldy.

Almaty ákimdigi taratqan málimetke sáıkes, jylý júıesine eń aldymen densaýlyq saqtaý, bilim ǵımarattary men basqa da áleýmettik obektiler qosylady.

Odan keıin jylý kóppáterli turǵyn úıler, sodan soń jylý energııasynyń basqa da tutynýshylaryna beriledi.

Qazirgi tańda qaladaǵy jylý kózderiniń, gaz jelileriniń, qazandyqtardyń daıyndyǵy 100% qamtamasyz etilgen.

Almatyda turǵyn úı qorynyń 8257 obektisine, 443 bilim jáne 91 densaýlyq saqtaý obektisine jylý beriledi.