Almatyda jylyna 200-ge jýyq jer silkinisi tirkeledi - ıÝrıı Ilın
ALMATY. QazAqparat - Jyl saıyn qala men Almaty oblysynyń aýmaǵynda eki júzge jýyq jer silkinisi bolady. Bul týraly megapolıs halqymen kezdesý barysynda Tótenshe jaǵdaılar mınıstri ıÝrıı Ilın aıtty, dep habarlaıdy QazAqparat tilshisi.
Aıtýynsha, byltyr Tótenshe jaǵdaılar mınıstri men seısmologııa ınstıtýty tájirıbelik-ádistemelik ekspedıtsııa ótkizdi. Mamandar qala men Almaty oblysynyń aýmaǵynda zertteýler júrgizedi.
«Qala aýmaǵynda 17 baqylaý stantsııasy ornalasqan, 2023 jyldyń sońyna deıin 28 stantsııa ornatý josparda. Aǵymdaǵy jyly kúshti jer silkinisteri týraly erte habarlaý júıesin engizý boıynsha jumys bastaldy. Qazirgi tańda Almaty qalasynyń mańynda «Darmen» mobıldi qosymshasymen ushtasqan jer silkinisi týraly erte habarlaý júıesiniń 9 seısmıkalyq stantsııasy ornatyldy»,- dedi ol.
Mınıstrdiń sózinshe, «Darmen» TJ qaýpi týraly halyqty dereý habardar etýge múmkindik beredi. Mysaly, magnıtýdasy 4 ball jáne odan joǵary jer silkinisi kezinde seısmodatchıkter iske qosylǵanda azamattardyń smartfondaryna habarlamalar avtomatty túrde jiberiledi.
«2000 jyldan bastap 240-qa tarta obekt seısmıkalyq kúsheıtildi, bıyl 7 bilim berý jáne densaýlyq saqtaý obektilerinde jumystar aıaqtalady. Ákimdiktiń qoldaýymen qulaqtandyrý júıesi jańǵyrtylyp, adamdar kóp jınalatyn ǵımarattar úshin tsıfrlyq jabdyqtar satyp alyndy.
Elimizdiń seısmıkalyq qaýipsizdigin qamtamasyz etý jónindegi 2023 jylǵa deıingi Jol kartasyn iske asyrý jalǵasýda. Osyǵan baılanysty, jergilikti atqarýshy organdardan Jol kartasyn ýaqtyly iske asyrý boıynsha qajetti sharalar qabyldaýdy suraımyn», - dedi ıÝrıı Ilın.
