Almatyda jylymyq aýa raıy qashanǵa deıin sozylady

ALMATY. QazAqparat – «Qazgıdromet» aqpan aıynda almatylyqtardy qandaı aýa raıy kútip turǵanyna boljam jasady, dep habarlaıdy QazAqparat tilshisi.

«Aldaǵy kúnderi, 20 aqpanǵa deıin Almatyda qar aralas jaýyn-shashyn bolady. Túnde de, tańerteń de tuman men kóktaıǵaq bolýy múmkin. Aýa temperatýrasy túnde -5-10 aıaz, kúndiz – 3 aıaz, +2 gradýs jyly bolady», – deıdi «Qazgıdromet» RMK Almaty qalasy boıynsha fılıalynyń meteorologııalyq boljamdar bóliminiń basshysy Dáýlet Qısebaev.

Almatyda aqpannyń úshinshi onkúndiginde aýa temperatýrasy birtindep kóteriledi degen boljam bar.

«Aqpan aıynyń sońynda aýa temperatýrasy kúndiz 5 gradýsqa deıin jylynady. Qardyń negizgi mólsheri osy kezeńde, ıaǵnı osy aıdyń sońynda erýi múmkin», - dep túsindirdi sınoptık.

Qazgıdromet ókiliniń aıtýynsha, qysqy mezgilde dalany tuman basýy - qalypty jaǵdaı.

«Bul anomalııa emes. Almatyda qańtar-aqpan aılarynda tumandy kúnderdiń ortasha sany jalpy alǵanda 5-6 kúndi quraıdy. Bul tumannyń ýaqyt boıynsha uzaqtyǵyna sáıkes. Sebebi, biz tumannyń bastalýy men aıaqtalýyn belgileımiz», - dedi Dáýlet Qısebaev.

Eske salaıyq, Almatyda qar aralas jańbyr jaýdy.

Osyǵan baılanysty qalada kóktaıǵaq baıqalady. Almaty polıtsııasy jol qozǵalysyna qatysýshylardy saq bolýǵa shaqyrady.

Búgin tańǵy altydan bastap megapolıstiń joǵarǵy bóliginde 25-ten astam jol-kólik oqıǵasy boldy.