Almatyda jylý elektr stansylarynan bólinetin zııandy qaldyq mólsheri azaıtylady
ALMATY. Mamyrdyń 27-si. QazAqparat /Erbol Azanbek/ -Almatynyń Jylý elektr stansylary (JES) bóletin zııandy qaldyqtar aldaǵy ýaqytta azaıtylady. Bul týraly búgin JES-tardan bólinetin zııandy qaldyqtardy azaıtý máselesine arnalǵan depýtattyq tyńdaý barysynda aıtyldy,
dep habarlaıdy QazAqparat.
Qazirgi kezde qala ishinde «AlES» AQ-na qaraıtyn eki JES jumys isteıdi. Taǵy eki JES-i Almaty mańyndaǵy Alǵabas eldimekeni men Ótegen batyr kentinde ornalasqan. Bulardan jylyna aýaǵa 58 myń tonnadan astam zııandy qaldyq shyǵarylady. Ótken jyly JES 1-den 5768 tonna, JES 2-den 35282 tonna, JES 3-ten 16 772 tonna, Batys jylý kesheninen 400 tonna zııandy qaldyq shyqqan. Bul qaladaǵy zııandy qaldyq shyǵarýdyń eń joǵary kórsetkishi.
Depýtattyq tyńdaýǵa qatysqan qalalyq máslıhattyń ekologııa, densaýlyq jáne tótenshe jaǵdaılar jónindegi turaqty komıssııasy tóraǵasynyń orynbasary Sembek Qalaqovtyń aıtýynsha máslıhat sheshimimen ótken jyldyń 25 maýsymynda Almatyda qorshaǵan ortany qorǵaýdy lastaý kórsetkishin tómendetýdiń 2009-2018 jyldarǵa arnalǵan baǵdarlamasy qabyldanǵan. «Bul baǵdarlama aıasynda JES-daǵy zııandy qaldyqtardy azaıtý basty maqsat» deıdi máslıhat depýtaty.
JES-tardyń jumysyn baqylaıtyn «AlEs»AQ ókilderi bul baǵytta jumystar jasalýda deıdi. Máselen barlyq JES-tarǵa zııandy qaldyqtardy azaıtýshy quraldar ornatylýda. JES 1-de qazirgi kezde zııandy qaldyqtarda 99,2 paıyzǵa azaıta alatyn qural ornatylyp bolǵan. JES 2 men 3-te bul qural 2008 jyldan bastap ornatyla bastaǵan. 2013 jyly tolyq ornatylyp bitpek. «AlES» ókilderi JES-y zııandy qaldyqtar qazirdiń ózinde azaıap kele jatqanyn aıtady. Máselen JES-da 2008 jylmen salystyrǵanda 2009 jyly 21 paıyzǵa azaıǵan. «Turbalarǵa zııandy qaldyqtardy azaıtýshy quraldar tolyq ornatylyp bitken kezde bul kórsetkish taǵy da tómendeıdi» deıdi «AlES» ókilderi. Al qalalyq Tabıǵı resrýstar jáne tabıǵatty paıdalanýdy retteý basqarmasynyń ókilderi buǵan qosymsha gaz ben zııany az kómir paıdalanýdy usynyp otyr.
