Almatyda jylý baǵasy qymbattaı ma?
ALMATY. QazAqparat - Almatyda jylý energııasynyń aqysy kóterile me? Jylý esepteý quraldaryn ornatqany úshin kommýnaldy qyzmetterge aqsha tóleý kerek pe? Osy jáne ózge de máseleler Almaty qalasy óńirlik kommýnıkatsııalar qyzmetinde ótken baspasóz jıyny barysynda aıtyldy, dep habarlaıdy QazAQparat tilshisi.
Qalanyń kommýnaldyq qyzmeti ókilderi únemi jylý qunyn kótermese shyǵynǵa batatyndyqtaryn aıtyp otyrady.
Alaıda ákimdik olardyń usynysyn qoldaı bermeıdi.
Tipti qalalyq Tabıǵı monopolııalardy retteý departamenti Almaty jylý jelileri kompanııasyna jylý aqysyn qaıta eseptep, tutynýshylarǵa 37,6 mln teńge qaıtarýǵa májbúrledi.
Energetıka jáne kommýnaldyq sharýashylyq basqarmasynyń basshysy Maqsut Isahov atalǵan talap mindetti túrde oryndalatynyn, alaıda ol úshin tutynýshylardyń tólem túbirteginde artyq tólengen somasy kórsetilýi tıistigin aıtty.
«Ortasha eseppen qalada jylý tarıfi 6700 teńge shyǵady. Kóbinese tutynýshynyń menshik formasyna jáne jylý esepteý quralynyń bar-joǵyna baılanysty shyǵady. Qazirgi tańda bul tarıftiń qalyptasýyna negiz bar. Apta saıyn ótetin shtab otyrysynda qysqy maýsymǵa daıyndyq máselesin talqylaımyz. Sońǵy otyrysta tarıf máselesi kóterilgen bolatyn. Tabıǵı monopolııalardy retteý departamentiniń basshysy qatysqan edi. Nátıjesinde tarıfterdiń kóterilýi týraly másele kúntizbeden alynyp tastaldy», - dep M.Isahov.
Almaty qalalyq jylý jelileri kompanııasynyń ókilderi kóptegen úılerde jylý esepteý quraldary joqtyǵyn alǵa tartty.
«Búginde Almatydaǵy úılerdiń 64% jylý esepteý quralymen jabdyqtalǵan. Jyl sońyna deıin 2600 úıdi osyndaı jabdyqpen qamtý kózdelgen. Ár úı quraldyń aqysyn 4 jylǵa 4 paıyzben bólip tóleıtin bolady», - dedi Almaty jylý jelileri kompanııasynyń bas ınjeneri Dmıtrıı Kırdıaıkın.
