Almatyda jylý baǵasy qymbattamaıdy
ALMATY. QazAqparat - Almaty qalasy Energetıka jáne kommýnaldyq sharýashylyq basqarmasynyń basshysy Ermek Úsenbaev jylý tarıfine qatysty málimdeme jasady.
«2016-2017 jylǵy jylytý maýsymynda baǵa óspeıdi. Ákim tarıfti saqtaýdy tapsyrdy. Biz jylý, sýyq sý, kanalızatsııa baǵasyna qatysty barlyq ótinishterimizdi qaıtaryp aldyq. Eseptegish quraldary barlarda tarıf saqtalady, joqtarda belgilengen norma boıynsha aqy alynady. Norma baǵasy bekitildi», - dedi Ermek Úsenbaev.
Onyń aıtýynsha, kommýnaldyq qyzmetter aldaǵy jylytý maýsymyna tolyǵymen daıyn. 5 qazannan bastap, jylý áleýmettik nysandar: mektep, bala baqsha, aýrýhanaǵa beriledi. 12-15 qazannan bastap, jalpy jylytý maýsymy bastalady.
«Bul jylytý maýsymynda bizde jetkilikti janar maı bar. Byltyr qys jyly bolǵandyqtan, artylyp qalǵan qorymyz saqtaldy. Tabıǵı gazdy jetkizý bar. Qala gazsyz qalmaıdy. 2013, 2014 jyldary qıyndyqtar bolǵan, qazir gaz boıynsha barlyq másele sheshildi», - dedi basqarma basshysy.
E. Úsenbaev bıyl memlekettiń bıýdjetinen jylytý maýsymyna daıyndyq úshin 45 mlrd teńge bólingenin, onyń ishinde 8 mlrd basqarmanyń óz qarjysy bolǵanyn atap ótti.
«Shyǵyndar 17 paıyzǵa azaıdy. Ózderińiz bilesizder, daǵdarys. Bıýdjet bıyl qysqartylǵan. Osyǵan baılanysty, bul qystan bar qarjymyzben shyǵamyz. Qarjylandyrýdyń arqasynda jeliniń tozýy, tótenshe jaǵdaılardy azaıta alamyz», -dedi ol.
