Almatyda jylqyny kúrekpen uryp, zábir kórsetkender jazalanady - polıtsııa
ALMATY. QazAqparat - Almaty polıtsııasy jylqylardy kúrek, taıaqpen urǵandardy anyqtady, dep habarlaıdy QazAqparat tilshisi.
Jaqynda jelide belgisiz bireýlerdiń jylqyny júk kóligine kúshpen mingizýge tyrysyp jatqany týraly vıdeo tarady. Olar jylqyny kúrek, taıaqpen soǵyp jatty.
«Jylqylar at sportynyń atqorasynda bolatyn. Qazir onyń basshysy aýysyp, tórt attyń eti qajet bolǵan soń olardy osylaı júk kóligine qaraı súıregen...» dep jazdy eriktiler.
Almaty qalalyq polıtsııa departamenti bul is boıynsha búkil aıyptalýshylardyń (bes negizgi kúdikti) anyqtalǵanyn habarlady.
Olardyń qatysýymen qajetti tergeý is-sharasy júrgizilip jatyr.
«5 qazanda Qylmystyq kodekstiń 316-babynda kózdelgen qylmystyq quqyq buzýshylyq quramynyń belgileri (janýarlarǵa qatygezdikpen qaraý) boıynsha Almaty polıtsııa departamenti is qozǵady. Qazir ol is qalalyq polıtsııa departamenti anyqtaý basqarmasynyń óndirisinde. Tergeý jalǵasyp jatyr. Onyń nátıjesi boıynsha aqparattyq habarlama daıyn bolady», - dep jazdy óziniń Instagram paraqshasynda Almaty PD bastyǵynyń orynbasary Rýstam Abdrahmanov.
