Almatyda «Jyl tańdaýy, Altyn adam 2009» Ulttyq júldesiniń jeńimpazdary anyqtaldy
ALMATY. Jeltoqsannyń 2-si. QazAqparat /Erbol Azanbek/ - Keshe keshkisin Almatyda Abaı atyndaǵy Memlekettik opera jáne balet teatrynda «Jyl tańdaýy, Altyn adam-2009» Ulttyq júldesin tapsyrý rásimi ótti,
dep habarlaıdy QazAqparat.
Saltanatty keshte dástúr boıynsha ár saladaǵy jyldyń eń úzdik, tabysty adamdary men kompanııalary marapattaldy. Bıylǵy jyly festıvaldiń 10 jyldyq mereıtoıyna oraı atalymdarǵa «Táýelsizdiktiń alǵashqy 10 jyldyǵyndaǵy eń úzdik joba, adam» atalymy qosylǵan. Bul atalym boıynsha «Eń úzdik mádenı joba» ataǵyn Astanadaǵy K.Baıseıitova atyndaǵy opera jáne balet teatry, Eń úzdik sportshy ataǵyn Olga Shıshıgına, 10 jyldyqtaǵy mýzykalyq sımvol ataǵyn Marat Bısenǵalıev, eń úzdik bilim sapasy ataǵyn Astanadaǵy Mýzyka akademııasy aldy. Al jyldyń eń úzdik telejýrnalısi Artýr Platonov, eń úzdik jýrnalısi Sapa Mekebaev, jyldyń eń úzdik patrıoty Dmıtrıı Petrýhın, Mádenıetke eńbek sińirgen eń úzdik adamy Doshan Joljaqsynov, jyl sportshysy Sııazbek Dalıev, jyldyń dárigeri Nıkolaı Dıachenko, jyl ǵalymy ataǵy Serik Aqsholaqovqa berildi. Al jyl tańdaýy 36 atalym boıynsha ótti. Festıvaldiń basty júldesi Bıznes gran-prı «Nomad ınshýrans» AQ saqtandyrý kompanııasyna buıyrdy. BAQ salasy boıynsha jyldyń №1 telearnasy ataǵy KTK arnasyna, №1 qoǵamdyq-ekonomıkalyq jýrnal ataǵy «Vox Populi», eń úzdik kabeldik telearna operatory «Alma-tv» kompanııasyna berildi. Áleýmettik saladaǵy eń úzdik jarııalanymy úshin «Karavan» gazeti, qoǵamdaǵy mańyzdy máselelerdi kótergeni úshin «Argýmenty ı fakty» basylymy arnaıy júldege ıe boldy.
