Almatyda jyl sońynda úsh ákimshilik saýda kesheni ashylady
ALMATY. QazAqparat - Almatyda jyl sońyna deıin 200 myń sharshy metrden asatyn úsh ákimshilik saýda kesheni ashylady. Bul týraly búgin Óńirlik kommýnıkatsııalar qyzmetinde ótken baspasóz máslıhatynda Almaly aýdanynyń ákimi Jasulan Estenov aıtty, dep habarlaıdy QazAqparat tilshisi.
«Qazirgi tańda aýdanda jańa óndirister men kásipkerlik sýbektileriniń ashylýyna, jańa jumys oryndaryn qurýǵa erekshe nazar aýdarylyp otyr. Jyldyń sońyna deıin úsh iri nysan ashylady: «Abylaı han Plaza» saýda-ákimshilik kesheni, «Jibek joly» saýda-qurylys ortalyǵy jáne «Kaısar Plaza» ákimshilik ǵımarattary. Ǵımarattardyń jalpy kólemi - 201 098 sharshy metr. Oǵan tartylǵan ınvestıtsııalar sommasy 45 mlrd. teńgeni qurap, 1000-nan astam jumys orny qurylady», - dedi aýdan ákimi.
Sonymen qatar, aýdan ákimi 88 balalar oıyn alańy men 37 sport alańy ornatylǵan 93 aýla aýmaǵyna kúrdeli jóndeý júrgizilgenin aıtty.
«Kelesi jylǵa 100 aýlany jóndeýge arnalǵan jobalyq-smetalyq qujattama ázirlenip jatyr. Bıylǵy jyly qazan aıynda Tilendıev kóshesinde 160 orynǵa arnalǵan «Aıbala» jekemenshik balabaqshasy ashyldy. Sonymen qatar, atalǵan máseleni sheshýge bıznes-qurylym ókilderi de tartylýda, Atap aıtqanda memlekettik-jekeshelik seriktestigi negizinde Tilendıev kóshesinde 400 orynǵa arnalǵan balabaqsha qurylysy jobasy júzege asyrylýda»,- dedi ol.
