Almatyda jyl sońyna deıin taǵy 2 metro stansasy iske qosylady

ALMATY. QazAqparat - Almaty ákimi Baqytjan Saǵyntaev «Saryarqa» jáne «Dostyq» beketteriniń qurylysy boıynsha kóshpeli jumys keńesin ótkizdi, dep habarlaıdy QazAqparat tilshisi.

Megapolıs ákimi beketterdi abattandyrý, joldardy tóseý jáne tonnelderdi uńǵylaý jumysynyń qalaı júrip jatqanyn tekserdi.

Baqytjan Saǵyntaev týyndaǵan máselelerdi jedel sheshýdi jáne tek qala ǵana emes, elimiz úshin de mańyzdy aýqymdy qurylysty aıaqtaý úshin kúsh-jigerdi biriktirýdi tapsyrdy.

Kóshpeli keńes barysynda merdigerler qala ákimin jyl sońyna deıin ekinshi bastaý keshenin tehnıkalyq iske qosatynyna jáne eki beketti paıdalanýǵa berýge mindettenetinine sendirdi.

Metropolıtenniń birinshi jelisiniń ekinshi kezeńiniń ekinshi bastaý kesheni Abaı dańǵylynyń astyna, Altynsarın dańǵylynan batysqa qaraı ıAssaýı kóshesine deıingi jerde ornalasqan. Keshen qýma tonnelderden jáne eki beketten – tereń qazylǵan pılon tıpte jasalǵan «Saryarqa» jáne taıaz qazylǵan «Dostyq» beketterinen turady.

Jobanyń jalpy daıyndyǵy - 80%-ǵa jýyq.

Búginde «Saryarqa» beketinde árleý, abattandyrý jáne ınjenerlik jelilerdi tóseý jumystaryn aıaqtaý qajet.

Beket «tereń qazylǵan» túrge jatady, pılon tıpti jáne bir vestıbıýlden jáne eki kireberis toptan turady.

Bekette 2 lıft jáne 8 eskalator qarastyrylǵan.

«Dostyq» beketinde de árleý, abattandyrý jáne ınjenerlik jelilerdi tóseý jumysy júrip jatyr.

Beket taıaz qazylǵan baǵanaly tıpti, munda eki vestıbıýl men alty kirý esigi bolady.

Mamandardyń esepteýinshe, ekinshi bastaý kesheni iske qosylǵanda kúndelikti jolaýshylar aǵyny shamamen 85 myń adamdy quraıdy.

Osylaısha, metropolıtendegi jolaýshylar tasymalynyń kólemi edáýir artady jáne Abaı dańǵylynyń júktemesi aıtarlyqtaı azaıady.