Almatyda jyl sońyna deıin qýatty jer silkinisi bolmaıdy – seısmolog

ALMATY. QazAqparat – Almatyda jyl sońyna deıin qýatty jer silkinisteri bolmaıdy. Bul týraly Óńirlik kommýnıkatsııalar qyzmetiniń brıfınginde QR TJM qarasty Seısmologııa ınstıtýtynyń dırektory Dáýlet Sársenbaev aıtty, dep habarlaıdy QazAqparat tilshisi.

«Bizdiń ınstıtýttyń bazasynda turaqty boljam jasaıtyn komıssııa bar. Onyń qorytyndysy boıynsha, osy jyldyń sońyna deıin Almaty qalasynyń aýmaǵynda qýatty jer silkinisteri kútilmeıdi», - dedi Dáýlet Sársenbaev.

Onyń aıtýynsha, damyǵan elderdiń ózinde de jer silkinisiniń naqty bolatyn nemese bolmaıtynyn aıta almaıdy.

«Ǵalymdar kún saıyn seısmologııalyq stantsııalardan málimetter jınap, boljamdy anyqtaý úshin 200-den astam parametrdi óńdeıdi. Degenmen bizdiń sarapshylar qalada 0,7 yqtımaldylyq boıynsha kúshti jer silkinisi bolmaıdy dep senimdi túrde aıtýda. Qazir qala turǵyndaryn kúshti jer silkinisi týraly erte habarlaý júıesin engizý jumystary júrgizilýde. Memleket basshysynyń tapsyrmasyna oraı 2025 jylǵa deıin erte habarlaý júıesi men Dármen mobıldi qosymshasyn biriktire otyryp, 28 erte habarlaý júıesiniń stantsııasyn ornatý josparlanýda», - dedi D.Sársenbaev.

Eske salaıyq, Almatyda 2 jeltoqsan kúni jalpyqalalyq seısmojattyǵý ótedi.