Almatyda jyl sońyna deıin 5 mektep salynady
ALMATY. QazAqparat- Almatyda jyl sońyna deıin jańa 5 mektep salynyp, úsh mektep keńeıtiledi. Bul týraly Óńirlik kommýnıkatsııalar qyzmetiniń brıfınginde Almaty qalalyq qurylys basqarmasy basshysynyń orynbasary Ulan Ońalbaev málim etti, dep habarlaıdy QazAqparat tilshisi.
«Búginde qalada 25 bilim berý nysanynyń qurylysy júrip jatyr. Jyl sońyna deıin «Qalqaman-2», «Qaırat», «Darhan», «Mádenıet» jáne «Nurkent» shaǵyn aýdandarynda 7500 oryndyq 5 mektep salynady. Sondaı-aq, 670 oryndyq qosalqy qurylys nysanyn salý arqyly №48, 191, 9 úsh mektep keńeıtiledi», - dedi Ulan Ońalbaev.
Sonymen qatar, ol balabaqsha qurylysyna toqtaldy.
«920 oryndy «Jas Qanat», «Saıaly-2», «Aınabulaq-4», «Aqjar» shaǵyn aýdandarynda tórt jańa balabaqsha salynady. Sondaı-aq basqarma qaramaǵynda «Aqjar» jáne «Nurkent» shaǵyn aýdandarynda 1350 oryndy eki ınnovatsııalyq shyǵarmashylyq ortalyq salý qarastyrylǵan. Olardy paıdalanýǵa berý 2023 jyldyń ekinshi toqsanyna josparlanyp otyr»,- dedi ol.
Sonymen qatar, ol bıyl «Zerdeli» shaǵyn aýdanynda 380 oryndy jataqhanasy bar 720 oryndy kásibı tehnıkalyq ýchılışeniń qurylysy bastalatynyn jetkizdi.
Sondaı-aq, №2 Almaty memlekettik pedagogıkalyq kolledji úshin 450 oryndy qosymsha qurylys salý jobasy ázirlenýde.
«Al jataqhanalardaǵy oryn tapshylyǵy máselesin sheshý maqsatynda 600 oryndy 2 jataqhana salý jobasy ázirlenýde (Almaty avtomehanıkalyq kolledji jáne Alataý aýdanynyń ónerkásiptik aımaǵynda ornalasqan jataqhanasy bar ınnovatsııalyq tehnologııalar kolledji). Bul nysandardyń qurylysy 2023-2024 jyldarǵa josparlanǵan»,- dep atap ótti spıker.
