Almatyda jyl sońyna deıin 3 jolaıryǵy salynady
ALMATY. QazAqparat - Almatyda jyl sońyna deıin úsh jol aıryǵy salynady, dep habarlaıdy QazAqparat tilshisi.
Bul týraly búgin qalalyq Qoǵamdyq keńes otyrysynda qalalyq mobıldilik basqarmasynyń basshysy Saǵyndyq Telibaev aıtty.
Onyń aıtýynsha, bıyl jeltoqsan aıynda Rysqulov pen Qulja tas joly (jumsalatyn qarjy - 20,3 mlrd teńge), Seıfýllın men Jansúgirov kósheleri (8,6 mlrd teńge), Rysqulov pen Emtsov kósheleriniń qıylysyndaǵy (5,3 mlrd teńge) jol aıryqtarynyń qurylysy tolyq aıaqtalady.
«Qurylys jumystary aıaqtalǵanda kishi kólik aınalma joly paıda bolady. Bul jolaıryqtarynyń arqasynda kólikterdi ótkizý aǵyny 15 paıyzǵa artatyn bolady», - dedi basqarma basshysy Saǵyndyq Telibaev.
Sonymen qatar, Almatyda Úlken Almaty aınalma jolyna eki kóshe jalǵanatyn bolady. Olardyń biri Abaı kóshesi qalanyń shetki aýdandaryna deıin uzyndyǵy 4,8 shaqyrym bolatyn kóshemen sozylady. Jumystar 2019 jeltoqsanynda aıaqtalady.
Saın kóshesiniń Aqyn sara kóshesi men Rysqulov kóshesiniń aralyǵy tolyq jóndelip, 3,1 km bolatyn kóshe bolyp Úlken Almaty aınalma jolyna jalǵanady. Qurylys jumystary 2020 jyldyń qyrkúıegine deıin aıaqtalady.
