Almatyda jyl saıynǵy halyqaralyq PR-forým ótip jatyr

ALMATY. QazAqparat- Búgin Almatyda 11-shi halyqaralyq PR-forýmnyń jumysy bastaldy. Onda otandyq PR salasynyń mamandary men sheteldik sarapshylar qoǵammen baılanys salasynda Qazaqstanda jáne álemde oryn alyp jatqan máselelerdi, qubylystardy jáne jańa baǵyttardy talqylaıtyn bolady.

«Qazaqstanda bıyl kóptegen kompanııalarda pıar-bıýdjettiń kólemi orta eseppen 20-30 paıyzǵa qysqartyldy. Kelesi jyly da osyndaı jaǵdaı saqtalýy múmkin. Sáıkesinshe, jumys isteý tásili de ózgerip jatyr. Sondyqtan pıar naryǵynyń mamandary osyǵan beıimdele otyryp, osy salada qolǵa alynyp jatqan jańa tehnologııalardyń qalaı jumys isteıtindigin jaqsy meńgerýleri tıis. Jańa tehnologııalar - osy 11-shi forýmnyń kún tártibindegi basty taqyrptardyń biri» - dedi qazaqstandyq PR-shy klýbynyń prezıdenti Ásel Qaraýylova.

Sonymen qatar, búgingi forým barysynda ústimizdegi jyldyń 10-11 naýryzy aralyǵynda Shveıtsarııanyń Davos qalasynda ótken Halyqaralyq kommýnıkatsııa forýmynyń qararlary, Eýrazııalyq bıznes forým aıasynda júrgiziletin «Topjarǵan» bedeldik reıtıngi jobasy sheńberinde júrgizilgen zertteýlerdiń qorytyndysy talqylanady.