Almatyda jyl saıyn 200-den astam adam ıis tıip ýlanady
ALMATY. QazAqparat - Almaty TJD jáne qalalyq densaýlyq saqtaý basqarmasynyń ókilderi brıfıng barysynda ıis tıip ýlanǵan adamdar týraly aıtyp berdi, dep habarlaıdy QazAqparat tilshisi.
Aýa raıynyń salqyndaýy men jylytý maýsymynyń bastalýyna baılanysty qalada ıis tıip ýlanǵan adamdardyń sany ósip keledi.
«Statıstıkalyq málimetterge sáıkes, ıis tııýden zardap shekken eresek patsıentterdiń sany orta eseppen alǵanda jylyna 200-250 adamdy qurap otyr. Al ıis tıgen balalardyń sany orta eseppen alǵanda - 80-90 adam. Sonyń ishinde statsıonarlyq em alýǵa muqtaj 30-50 adam bar. Qalǵan patsıentter medıtsınalyq kómekti aýrýhananyń qabyldaý bóliminde alyp, emhanalarǵa ambýlatorlyq em qabyldaýǵa jiberiledi», - dedi Almaty qalalyq densaýlyq saqtaý basqarmasy bastyǵy orynbasarynyń mindetin atqarýshy Janar Mádeeva.
Densaýlyq saqtaý basqarmasynyń málimetinshe, 2016 jyly ıis tıip ýlanǵanyn aıtyp 272 adam shaǵymdanǵan, sonyń ishinde 80 adam aýrýhanaǵa jatqyzyldy. 2017 jyly shaǵymdanýshylardyń sany 223 adam bolǵan. Sonyń ishinde 67 adam aýrýhanaǵa jatqyzyldy. Bıyl ıis tııýden zardap shekkender sany - 108 adam. Aýrýhanada em qabyldaýǵa 24 patsıent jiberildi.
«2016 jyly ıis tıip ýlanǵan balalardyń sany 99 adam bolǵan. Sonyń ishinde 45 bala aýrýhanaǵa jatqyzyldy. 2017 jyly bizge 87 bala jetkizildi, 41-ne statsıonarlyq kómek qajet bolǵan. Bıylǵy 9 aıdyń ishinde 62 bala jetkizilip, 22-si aýrýhanaǵa jatqyzyldy. Iis tıip ýlanýdyń negizgi sebepteri - jylytý júıesiniń aqaýy, sodan týyndaıtyn ýyttylyǵy joǵary kómirtek totyǵynyń ǵımaratta jınalýy. Órt qaýipsizdiginiń negizgi erejelerin saqtap otyrý ıis tııý jáne turmystyq gazdan ýlanýǵa qatysty tótenshe jaǵdaılardyń týyndaý qaýpin aıtarlyqtaı tómendetedi», - dep jalǵastyrdy ol.
Dárigerler Almatydaǵy jekemenshik sektor turǵyndaryna jylytý maýsymynyń aldynda peshterin tolyq tekserip shyǵýdy eskertti.
