Almatyda «Jyl muǵalimi» baıqaýynyń jeńimpazdaryna páter men kólik kilti tapsyryldy
ALMATY. QazAqparat - Muǵalimderdiń kásibı merekesi qarsańynda Almaty ákimi Baqytjan Saǵyntaev «Jyl muǵalimi» baıqaýynyń jeńimpazdaryna baǵaly syılyqtar men aqshalaı granttar tapsyrdy, dep habarlaıdy QazAqparat tilshisi.
Almaty telearnasynyń tikeleı efırinde kórsetilgen sharaǵa pedagog ardagerler, muǵalimder jáne bilim uıymdarynyń basshylary qatysty.
Merekelik rásim barysynda «Almatynyń jyl muǵalimi» jáne «Almaty qalasy ákiminiń arnaıy granty» qalalyq baıqaýlarynyń, sonymen qatar «Úzdik pedagog» respýblıkalyq baıqaýy qalalyq týrynyń jeńimpazdary marapattaldy.
«Almatynyń jyl muǵalimi» jáne «Almaty qalasy ákiminiń arnaıy granty» qalalyq baıqaýlary Almaty ákimi Baqytjan Saǵyntaevtyń bastamasy boıynsha byltyr alǵash ret uıymdastyrylǵan edi.
«Jyl muǵalimi» qalalyq baıqaýynyń Gran-prı júldegeri №133 mekteptiń oqytýshysy Maqpal Shúkeevaǵa 2 bólmeli páterdiń kilti, al 1-oryndy jeńip alǵan №140 mektep-gımnazııanyń oqytýshysy Dáýren Saǵynǵalıevke kólik kilti tapsyryldy.
Qalǵan jeńimpazdarǵa aqshalaı júldeler men granttar berildi. Birqatar muǵalim Bilim jáne ǵylym mınıstrliginiń alǵys hatyn aldy.
Qalanyń pedagogıkalyq qaýymdastyǵyn quttyqtaǵan Almaty ákimi ustazdardyń eń mártebeli mıssııa – óskeleń urpaqqa tárbıe men bilim beretinderin atap ótti.
«Muǵalimderge zor jaýapkershilik júktelip otyr, óıtkeni bolashaqta elimizde qandaı urpaqtyń ómir súrip, eńbek etetini ustazdarǵa tikeleı baılanysty», - dedi qala ákimi Baqytjan Saǵyntaev.
Qala ákimi bilim júıesin damytý sharalary, bilim berýdiń jańa mekemelerin salý, jas mamandarǵa qoldaý kórsetý týraly da aıtyp ótti. Mysaly, bıyl qala mektepterinde ózderiniń eńbek joldaryn bastaǵan jas muǵalimderge materıaldyq kómek retinde birrettik tólem berý praktıkasy jalǵasatyn bolady. Qazan aıynda jalpy somasy 27 mln teńgeden asatyn tólemdi 549 jas muǵalim aldy.
Aıta keterligi, qala muǵalimderiniń turǵyn úı jaǵdaıyn jaqsartý máselesine aıryqsha nazar aýdarylady. Búgingi kúni jeńildetilgen nesıe beretin «Almaty jastary 3.0» qalalyq baǵdarlama aıasynda 187 jas muǵalim baspanaly boldy.
Almatynyń bilim júıesinde 32 myńnan astam pedagog bar, olardyń 500-den astamy - bıyl ózderiniń alǵashqy eńbek joldaryn bastaǵan jas mamandar
