Almatyda jyl basynan beri jol belgileriniń talaptary 9 myńnan astam ret buzylǵan
ALMATY. QazAqparat - Almatyda jyl basynan beri jol belgileri men tańbalarynyń talaptary 9 myńnan astam ret buzylǵan. Bul týraly búgin Almaty qalalyq ІІD baspasóz qyzmetinen habarlady.
Sonymen qatar, Almaty qalasynda jol-patrýldik polıtsııa men mamandandyrylǵan batalon ekıpajdary jol qozǵalysy erejesiniń 55 myń 777 ret buzylǵandyǵyn anyqtady.
«Jol belgileri men tańbalarynyń talaptaryn saqtamaý. Bul quqyq buzýshylyq áreket QR Ákimshilik quqyq buzýshylyq kodeksiniń 601- babymen retteledi. Bir qaraǵanǵa bular eleýsiz ereje buzýshylyq bolyp kórinýi múmkin. Biraq, kóp jaǵdaıda dál osyndaı áreketter ár túrli jol-kólik oqıǵalaryna jáne júrgizýshiler tártibiniń tómendeýine ákep soǵady. Zańǵa baǵynýshylyq jáne jol qozǵalysy erejesin saqtaý - árbir azamattyń mindeti. Eger oǵan qaýipti qural - avtokólikti basqarý senip tapsyrylsa, onda jaýapkershilik te arta túsedi», - dedi óz sózinde Almaty qalalyq ІІD Jergilikti polıtsııa qyzmetiniń bastyǵy, polıtsııa podpolkovnıgi Jasulan Baıkenov.
Sonymen qatar ol Almatyda jyl basynan beri jol qozǵalysy erejesiniń buzylýyna qatysty statıstıkalyq málimetterdi keltirdi.
- Kólik quralyn mas kúıde basqarý - 2 myń 303 ret bolǵan.
- Kólik quralyn memlekettik tirkeý nómirinsiz basqarý - 2 myń 115 ret.
- Kólik quralyn qaýipsizdik belbeýin taqpaı aıdaý - 5 myń 756 ret.
- Kólik aıdap kele jatyp, uıaly telefonmen sóılesý - 3 myń 899 ret.
- Basyp ozý, oraǵytý, manevr jasaý jáne qatarlas qozǵalý erejelerin buzý - 5 myń 260 ret.
- Kólik quralyn qujatsyz basqarý - 2 myń 338 ret.
- Kólik júretin joldy lastaý - 4 myń 700 ret.
