Almatyda jyl basynan beri jaıaý júrginshiler 127 myńnan asa jol júrý erejelerin buzǵan
ALMATY. Shildeniń 30-y. QazAqparat /Názıra Eleýhan/ - Almatyda jol- kólik oqıǵalarynyń aldyn alý, jol erejeleriniń saqtalýyn qadaǵalaý, jaıaý júrginshilerdiń qaýipsizdigin arttyrý maqsatynda «Jaıaý júrginshi» jedel-saýyqtyrý sharasy ótip jatyr.
Almaty qalasy ІІD-niń Jol polıtsııasy basqarmasy bastyǵynyń orynbasary Jandos Muratalıevtiń aıtýynsha, jyl basynan beri jaıaý júrginshiler 127 myńnan asa jol júrý erejelerin buzǵan. «Jarty jylda 1047 jol-kólik oqıǵasy tirkeldi. Onyń saldarynan 77 adam kóz jumsa, 1142 adam túrli jaraqattarmen aýrýanaǵa tústi. Jaıaý júrginshilerdiń kinásinen 277-den astam apatty jaǵdaı oryn alyp, sonyń saldarynan 27 adam qaza boldy, sondaı-aq jaraqat alyp, zardap shekkenderdiń sany 261 adamǵa jetip otyr», dedi ol.
Apattardyń negizgi sebepteri joldarda jaıaý júrginshilerdiń júrip-turý qaýipsizdigi erejesin buzǵandyǵy bolǵan. «Sol sebepti qalanyń barlyq aýdandarynda arnaıy narıadtar qoıylyp, jaıaý júrginshiler erekshe nazarǵa alynyp, qatań baqylanatyn bolady. Árbir ekinshi oqıǵa jaıaý júrginshilerdiń kinásinen bolýda», dedi J. Muratalıev.
Osyǵan baılanysty qalalyq jol polıtsııasy basqarmasy qala turǵyndarynan jolda júrý erejelerin qatań saqtaýdy eskertedi.
