Almatyda jyl basynan beri turmystyq gazdy paıdalaný kezinde 28 jazataıym oqıǵa boldy
ALMATY. QazAqparat - Almatyda jyl basynan beri turmysta gaz jabdyǵyn paıdalaný kezinde 28 jazataıym oqıǵa boldy. Bul týraly Almaty óńirlik kommýnıkatsııalar qyzmeti alańynda Almaty qalasy TJD Memlekettik órt baqylaý basqarmasynyń basshysy Aleksandr Raý málimdedi, dep habarlaıdy QazAqparat tilshisi.
28 jazataıym oqıǵanyń 17-si tabıǵı gazben ýlaný (36 adam zardap shekti, onyń ishinde 22 bala, 3 adam qaza tapty), 11-i gaz-aýa qospasynyń jarylýy (6 adam túrli aýyrlyqtaǵy kúıik aldy) boldy.
«Júrgizilgen taldaýǵa sáıkes, órttiń, jarylystyń jáne adamdardyń ýly gazben ýlanýynyń 60%-y adamdardyń jylytý aspaptaryn, gaz jabdyǵyn paıdalaný kezinde ózderiniń nemquraıly qarym-qatynasynan týyndaıtynyn kórsetti. Turǵyndar murjalardaǵy bitelýdi baqylamaıdy, murjany durys qospaıdy, sondyqtan onyń tutastyǵy buzylady. Turǵyndar gaz plıtalaryn qaraýsyz qaldyrǵan jaǵdaılar boldy. Jazataıym oqıǵalardyń taǵy 40%-y gazdyń shyǵýy, rezeńke tútiktiń tozýy, gaz ballondarynyń durys saqtalmaýy saldarynan oryn alady», - dep atap ótti Raý.
Sondaı-aq, TJ departamentiniń ókili adamdardyń gazdy abaısyz qoldanýy qaıǵyly jaǵdıǵa ákeletini týraly mysaldar keltirdi.
«Máselen, gazdyń aǵyp ketý oqıǵasy bıyl 29 qańtarda Ibragımov kóshesindegi kóp qabatty úılerdiń birinde boldy. Oqıǵaǵa as úıdegi gaz ballonynyń redýktoryndaǵy shlangtyń tutastyǵyn buzý sebep boldy. Osy sebepti tutaný paıda boldy, nátıjesinde bir adam deneniń 80% termııalyq kúıik aldy.
Taǵy bir qaıǵyly oqıǵa 26 sáýirde Fızýlı kóshesindegi jeke úıde oryn aldy. Tabıǵı gazben jylytý peshiniń aqaýy saldarynan adam qaıtys boldy. Sebep – jalynnyń sónýi jáne bólmege gazdyń keıinnen aǵý, peshtiń avtomatıkasy gaz berýdi óshirmeýi, sıgnalızatsııa klapanynyń jumys istemeýi.
Taǵy eki almatylyq 1 jeltoqsanda Aqan seri kóshesindegi úsh qabatty kóppáterli turǵyn úıde qaza tapty. Onda tútin murjasynyń durys jalǵanbaýynan janý ónimderiniń paıda bolýy oryn aldy. Páterde jylytý qurylǵysy kásibı emes túrde salyndy, murjanyń ornyna eki metrlik gofrlengen qubyr ornatyldy, gaz berýdi avtomatty túrde toqtatatyn qurylǵy bolmady»,- dedi Aleksandr Raý.
Aleksandr Raý osy jazataıym oqıǵalardyń sebebi gaz aspaptarynyń tútin murjalary men jeldetkish arnalaryna sapasyz jáne formaldy tehnıkalyq qyzmet kórsetý bolǵanynan ekenin aıtty.
TJD Memlekettik órt baqylaý basqarmasynyń bastyǵy gaz ballondary men gaz jabdyqtaryn osy ónimdi ótkizýge sertıfıkattary bar mamandandyrylǵan uıymdardan ǵana satyp alýǵa shaqyrdy.
«Eshqashan gaz qurylǵylaryn, onyń ishinde gaz ballondaryn bóten adamdardan satyp almańyz. Mamandardyń qyzmetine júginip, gaz jabdyqtaryn jyl saıyn tekserip otyrý qajet. Jeldetý arnalaryn qadaǵalańyz, bólmeni únemi jeldetińiz, ásirese, jatar aldynda.
Gaz jabdyǵymen óz betinshe is-áreket jasaýǵa, tıisti ruqsatsyz gazdandyrýdy júrgizýge, gaz aspaptaryn jóndeýge jáne ornyn aýystyrýǵa kezdeısoq adamdardy tartýǵa tyıym salynady. Gazben baılanysty jumystardyń barlyq túrlerin mamandandyrylǵan uıymdar ǵana oryndaýy tıis»,- dep eskertti Raý.
Aıta keteıik, TJD málimetinshe Almatyda búginde qatty otynmen jylytylatyn 1 646 úı, 13 kóppáterli turǵyn úı bar. Sondaı-aq, turmysta gaz ballondary qoldanylatyn 312 kóppáterli turǵyn úı bar. Bul negizinen qazirgi ýaqytta turǵyndar jekeshelendirgen burynǵy jataqhanalar bolyp tabylady.
