Almatyda jyl basynan beri sheteldik azamattar tarapynan 313 qylmys jasalǵan

«Shet elderden keletin qonaqtardyń barlyǵy birdeı kóshi-qon zańynyń talaptaryn oryndaı bermeıdi. Bıylǵy jyldyń basynan beri kóshi-qon zańnamasyn buzǵandary úshin 20 327 adam ákimshilik jaýapkershilikke tartyldy. Olardyń ishinde 995 adam elden alastatyldy. Sondaı-aq, 210 jumys berýshi jáne aǵymdaǵy zańnamanyń buzylýyna jol bergenderi úshin Qazaqstannyń 11 870 azamaty ákimshilik tártipte jazaǵa tartyldy. Olarǵa jalpy somasy 96 mıllıon 885 myń 912 teńge aıyppul salyndy», - dedi Almaty qalalyq ІІD Kóshi-qon polıtsııasy basqarmasynyń bastyǵy, polıtsııa polkovnıgi Ashat Bútinshinov.

Almatyda bıylǵy jyldyń basynan kúni búginge deıin shet eldik azamattar tarapynan 313 qylmys jasaldy. Olardyń ishinde 120 qylmys - bógdeniń múlkin urlaý, 13 - usaq urlyq-qarlyq, 26 - alaıaqtyq,  9 - adam densaýlyǵyna aýyr nuqsan keltirý, 20 - tonaýshylyq, 17 - buzaqylyq, 1 - bógdeniń kólik quralyn zańsyz ıemdený, 6 - kisi óltirý, 6 - zorlaý, 72 - sottyń elden alastatý jónindegi sheshimin oryndamaý jáne 6 qylmystyq oqıǵa - aqsha bopsalaý boıynsha tirkeldi.    

«Almaty respýblıkanyń eń iri mádenı jáne qarjy-ekonomıkalyq ortalyǵy bolyp sanalǵandyqtan, mıgratsııalyq aǵym ózekti máselege aınaldy. Almaty qalalyq ІІD Kóshi-qon polıtsııasynyń bólimsheleri ótken kezeńde basqa da memlkettik organdarmen birlese otyryp, elge sheteldik azamattardyń kelý barysyn baqylaý boıynsha keshendi sharalar qoldandy. Mysaly, qoǵamdyq tártipti qamtamasyz etý jáne sheteldik azamattardyń elge kelýin baqylaý maqsatynda «Quqyqtyq tártip», «Mıgrant», «Zańsyz kelýshi» jáne basqa da jedel-aldyn alý sharalaryn júzege asyrdy», - dedi polıtsııa polkovnıgi.  

Aıta ketelik, Almaty qalalyq ІІD deregi boıynsha, Almatyǵa 2016 jyldyń basynan kúni búginge deıin 166 myń 729 sheteldik azamat kelgen. Basym bóliginiń elge kelýdegi maqsaty - jeke basynyń máselesin sheshý.