Almatyda jyl basynan beri mıllıon sharshy metr turǵyn úı paıdalanýǵa berildi
ALMATY. QazAqparat- Almatynyń Qoǵamdyq keńesiniń otyrysynda qalanyń áleýmettik-ekonomıkalyq damýy men qalalyqtardyń ómir súrý sapasyn jaqsartýdyń bolashaqtaǵy mindetteri qaraldy, dep habarlaıdy QazAqparat tilshisi.
Baqytjan Saǵyntaev damýdyń negizgi ekonomıkalyq kórsetkishterin atap ótti. Jeti aıdyń qorytyndysy boıynsha qala ekonomıkasyn qalpyna keltirýdiń joǵary qarqyny qamtamasyz etildi. Qysqa merzimdi ekonomıkalyq kórsetkish bıylǵy jyldyń qańtar-shilde aılarynda 109,1% boldy. Ónerkásip óndirisiniń kólemi 782,9 mlrd teńgege jetip, 22%-ǵa ósti.
Negizgi kapıtalǵa salynǵan ınvestıtsııalar kólemi 538,6 mlrd teńge boldy. Jyl basynan beri 1 189,7 myń sharshy metr turǵyn úı paıdalanýǵa berildi, 2 mln 604 myń sharshy metr baspana salý josparda. Tutyný baǵasynyń ındeksi tamyzda 105,6 paıyz boldy.
Qala ákiminiń orynbasarlary ózderi basqaratyn salalardyń damýy týraly baıandady.
Erjan Babaqumarov COVID-19 pandemııasymen kúresý sharalary týraly aıtty. Almaty koronavırýs ınfektsııasynyń taralýynyń tórt tolqynyna da tótep berdi. Sonymen qatar qalanyń densaýlyq saqtaý, bilim berý, mádenıet jáne sport salalarynyń damýy týraly aıtyldy.
S. Qusaıynov avtokólik ınfraqurylymynyń damýy, jolaýshylardy tasymaldaý, kógaldandyrý jáne ekologııany jaqsartý máselelerin sheshý týraly baıandady.
M. Ázirbaev turǵyn úı qurylysynyń qarqyny, áleýmettik nysandar, sondaı -aq ınjenerlik ınfraqurylym men qala qurylysy qyzmetiniń damýy, jerdi tıimdi paıdalaný týraly tolyq aqparat berdi.
M. Qıqymov shaǵyn jáne orta bıznesti qoldaý men halyqty áleýmettik qorǵaý, jumyspen qamtýǵa yqpal etý sharalary men jumys oryndaryn qurý, sondaı -aq ınvestıtsııalyq tartymdylyqty arttyrý, týrızmdi damytý, onyń ishinde Almaty taý klasteri týraly aıtty.
I. Óserov áleýmettik-ekonomıkalyq damýdyń negizgi kórsetkishterine qoljetkizý, ekonomıkany turaqtandyrý sharalary týraly baıandap berdi.
