Almatyda jyl basynan beri karantın rejımin buzǵan 3,6 myń nysan anyqtaldy

ALMATY. QazAqparat - 1 qańtar men 4 qyrkúıek aralyǵynda megapolıste karantın shekteýlerin buzǵan 3 626 nysan anyqtaldy. Sanıtarlyq qyzmet isterdiń sotta qaralatynyn aıtyp, jıi tártip buzatyndardyń tizimin jarııalady, dep habarlaıdy QazAqparat tilshisi.

Vedomstvonyń málimetinshe, jyl basynan beri monıtorıng toptar 37 972 obektini tekserdi. Bul - negizinen karantın erejelerin elemeıtin kóńil kóteretin oryndar.

Bıyl buzýshylarǵa qatysty 5 706 hattama jasaldy, onyń ishinde 597 zańdy tulǵaǵa 209 mln teńgeden asatyn aıyppul salyndy, jeke tulǵalarǵa qatysty maska rejımin buzǵany úshin shamamen 225 mln teńge aıyppul salynyp, 5109 hattama toltyryldy. 425 baptyń 3-bóliminiń 1-tarmaǵy boıynsha 65 nysannyń jumysyn toqtatý týraly sheshim qabyldandy.

Almatynyń ákimshilik sottaryna 462 bap boıynsha 76 materıal jiberildi. SEBD isteri sotta qaralatyn karantındi jıi buzatyndardy atady. Osy tizimdigiler: Alimus bılıard klýby, «Alem» karaoke klýby, Port Billiard Hall bılıard klýby, «Labırınt» kafesi, «Lala» dúkeni, «Kuanysh Grand Hall» banket zaly, Late niqt shoý bary, «Báıterek» meıramhanasy.

Mekemelerdi tekserý jalǵasyp jatyr, mysaly, 1-3 qyrkúıek aralyǵynda Almatyda 20 karantın buzýshy anyqtaldy. Sonymen 1 qyrkúıekte Almaly aýdanynda saǵat 23:47 shamasynda baqylaý tobynyń ókilderi «Naıdstar» dámhanasynda 30-ǵa jýyq adam bolǵanyn anyqtady.

Eske salsaq, Almatydaǵy epıdemıologııalyq jaǵdaı qubylmaly. Bir táýlikte 1 000-1 200 adamnan koronavırýs anyqtalady. Sondyqtan megapolıstiń turǵyndary men qonaqtary, sondaı-aq kásipkerlik nysandary sanıtarlyq normalar men karantın talaptaryn qatań saqtap, adamdar kóp jınalatyn jerlerden aýlaq bolǵandary jón.