Almatyda jyl basynan beri balalardyń qatysýymen 162 jol-kólik oqıǵasy oryn alǵan
ALMATY. 25 tamyz. QazAqparat /Ádilet Musahaev/ - Almatyda jyl basynan beri balalardyń qatysýymen 162 jol-kólik oqıǵasy oryn alǵan, sonyń saldarynan 7 jasóspirim qaza tapsa, 166 bala túrli deńgeıdegi jaraqattar alǵan, dep málimdedi Almaty qalasy ІІD baspasóz qyzmeti.
Tájirıbe kórsetkendeı, jol-kólik oqıǵasynan zardap shegetin balalardyń ortasha jas mólsheri 7 men 14 jas aralyǵynda bolyp otyr. Osy oraıda balalardyń qatysýymen bolatyn jol-kólik oqıǵalarynyń aldyn alý maqsatynda jol polıtseıleri jyl saıyn jańa oqý jyly qarsańynda «Abaılańyz, balalar!» atty keń kólemdi aktsııa ótkizedi. Búgingi tańda alyp shahar - Almatyda 181 jalpy bilim beretin mektepterde turaqty túrde jol belgilerin qadaǵalaý men kóshe boılaryna jaqyn ornalasqan mektepterdiń mańyna arnaıy belgiler ornatý jumystary atqarylýda. Qalamyzda mundaı arnaıy belgiler qoıatyn 65 nysan bar. «Balalar qaýipsizdigi» baǵdarlamasy aıasynda jyl aıaǵyna deıin taǵy da atalmysh 6 nysan tolyqtaı jol belgilerimen qamtamasyz etiledi»,- dep atap ótti Almaty qalasy ІІD JPB bastyǵy, polıtsııa polkovnıgi Arman Sarbasov.
Qazaqstan Respýblıkasynyń Іshki ister jáne Bilim mınıstrlikteriniń bastamasymen 2007 jyldyń 24 tamyzynan bastap jalpy bilim beretin mektepterde «Jol qozǵalysy Erejelerin» 1-8 synyp oqýshylarynyń oqý baǵdarlamasyna mindetti túrde engizý júzege asyrylǵan. Jańa oqý jylynyń bastalý qarsańynda jol polıtseıleri jyl saıyn almatylyq muǵalimdermen kezdesýler uıymdastyryp, mektep oqýshylarynyń qaýipsizdigi tóńiregindegi túrli máselelerdi talqylaýdy úrdiske aınaldyryp otyr.
«Dálirek aıtqanda, biz muǵalimderden jol júrý erejelerin oqytý úshin tájirıbelik sabaqtar ótkizetin synyptar daıyndyǵyn qamtamasyz etýdi, sondaı-aq jańa oqý jylynyń baǵdarlamasyna kerekti barlyq metodıkalyq ádistemelik quraldarmen jabdyqtaýdy talap etemiz. Mundaı eki jaqty tyǵyz qarym-qatynas balalardyń qatysýymen oryn alatyn jol-kólik oqıǵalarynyń aldyn alý men qalamyzdaǵy jol-kólik qozǵalysyn turaqtandyrýǵa óz paıdasyn tıgizedi degen senimdemiz»,- dep atap kórsetti polkovnık Sarbasov.
«Abaılańyz, balalar!» atty keń kólemdi jedel-aldyn alý is-sharasy 2011 jyldyń 1-5 qyrkúıek aralyǵynda ótkiziledi. 1-qyrkúıekten bastap jol polıtsııasynyń barlyq jeke quramy qala mektepterin aralap, saltanatty jıynda oqýshylarǵa jol júrý erejelerininiń saqtalýy jaıynda habarlama jasaıtyn bolady. Al, 1-synyp oqýshylaryna jańa oqý jylynyń birinshi kúni jol polıtseıleri jol júrý erejeleri týraly alǵashqy sabaq ótkizedi.
«Abaılańyz, balalar!» atty aldyn alý is-sharasy aıasynda jol polıtsııasynyń barlyq jeke quramy balalardyń qatysýymen oryn alatyn jol-kólik oqıǵalarynyń aldyn alý men jurtshylyq arasynda, sondaı-aq BAQ ókilderi men júrgizýshilerge túsindirme jumystaryn júrgizedi. Qaladaǵy barlyq júrgizýshiler men jol-kólik qozǵalysynyń basqa da qatysýshylaryna arnaıy daıyndalǵan býkletter taratylady. Sonymen qatar, árbir patrýldik avtokólikte júrgizýshilerdi jol júrý erejelerin buzbaýǵa shaqyratyn arnaıy jazylǵan dıskter bar. Júrgizýshilerdiń nazaryn aýdarý úshin bilim mekemeleriniń mańynda jáne adamdar kóp shoǵyrlanatyn jerlerde, jaıaý júrginshiler ótetin jolaqtarda jolǵa júgirip bara jatqan balalardyń keskini beınelengen maketter qoıylady. Sondaı-aq, jol polıtsııasy «Abaılańyz, balalar!» atty aktsııanyń ótkizilý kezeńinde barlyq júrgizýshilerdi kúndizgi ýaqytta kólikteriniń jaryq shamdaryn qosyp júrýge shaqyrady»,- dep málimdedi Arman Sarbasov.
