Almatyda jyl basynan beri avtokólik ıeleri 50 myńǵa jýyq jol erejesin buzǵan
ALMATY. QazAqparat – Almatyda bıylǵy eki aıda kólik júrgizýishiler qala joldarynda 49 myń 507 ret jol erejesin buzǵan, dep habarlaıdy QazAqparat tilshisi.
Almaty qalalyq polıtsııa departamentinen habarlaǵandaı, bıylǵy eki aıda qala joldarynda jol erejesin buzýdyń 49 myń 507 deregi anyqtaldy. Al avtomatty rejımde jumys isteıtin baqylaý-ólsheý tehnıkalyq qurylǵylary arqyly 127 myń 856 márte jol erejesin buzý deregi tirkeldi.
«Aıtý kerek, 9 myńǵa jýyq jol erejesin buzý deregi shetelde tirkelgen avtokólik júrgizýshilerimen, ıaǵnı, kórshiles memleketterdiń memlekettik tirkeý nómirleri bar kólik júrgizýshileri tarapynan jasalǵan. Salynǵan aıyppuldyń jalpy somasy 26 mln teńgeden asady. Buryn habarlaǵandaı, «Qorǵaý – Qaýipti júrgizýshi» avtomattandyrylǵan júıesi men saptaǵy polıtsııa bólimsheleri osyǵan uqsas quqyq buzýshylyqtardy anyqtaýǵa barynsha jumyldyrylǵan. Bizdiń mindetimiz – mundaı derekterdiń aldyn alý jáne mundaı tájirıbeni joıý», – dedi Almaty qalalyq polıtsııa departamentiniń Ákimshilik polıtsııa basqarmasynyń bastyǵy Ashat Qulbaev.
Ol sondaı-aq táýligine 800 myńnan astam kólik júretin iri qalada «Qorǵaý – Qaýipti júrgizýshi» júıesi óziniń tıimdiligin kórsetkenin atap ótti. Bul júıeniń arqyly jalǵan nómirlerdi paıdalanatyn júrgizýshilerdi, jarys uıymdastyryp, kólikti agressıvti júrgizetinderdi, sondaı-aq, jol erejelerin elemeıtin jol qozǵalysyna qatysýshylardy anyqtaýǵa baǵyttalǵanyn jetkizdi.
