Almatyda jyl basynan beri avtobýs júrgizýshileriniń kinásinen 170 jol apaty boldy
ALMATY. QazAzparat – Almatyda jyl basynan beri qoǵamdyq kólik júrgizýshileri 286 ret jol erejesin buzǵan, dep habarlaıdy QazAqparat tilshisi.
Almaty polıtseıleri qaladaǵy qoǵamdyq kólikterdiń júrgizýshileri jol qozǵalysy erejelerin óreskel buzyp jatqanyn aıtyp, dabyl qaǵady. Qalalyq polıııa departamentiniń málimetinshe, jyl basynan beri avtobýs júrgizýshileriniń kinásinen 170 jol apaty bolyp, saldarynan 3 adam qaza taýyp, 55 adam jaraqat alǵan. Sondaı-aq, qoǵamdyq kólikte jolaýshylardyń qulaýy jıilep ketti. Ol negizinen kólikti shuǵyl tejeý kezinde nemese kenetten qozǵalǵan kezde bolady. Jalpy, 2021 jyly avtobýs ishinde 328 jolaýshy qulap, zardap shekken.
«Almaty qalasynda 21 avtokásiporyn jumys isteıdi, olardyń balansynda 147 baǵyt boıynsha jolaýshylar tasymalymen aınalysatyn 2 200-den astam avtobýs pen 160 trolleıbýs bar. Qoǵamdyq kólikterge qatysty jol-kólik oqıǵalarynyń jaǵdaıy áli de alańdatady. Keıbir avtobýs júrgizýshileriniń qozǵalý tártibi óte tómen deńgeıde qalyp otyr. Avtoparkterdiń basshylyǵy júrgizýshilerge baqylaý júrgizbeıdi, júrgizýshi kýáliginiń bar-joǵyn, sondaı-aq, jelige shyǵar aldynda tehnıkalyq jaǵdaıyn teksermeıdi. Olar ekologııalyq jáne tehnıkalyq talaptarǵa saı kelmeıtin avtobýstardy jelige shyǵarýdy toqtatpady», - dedi Almaty qalalyq polıtsııa departamentiniń Ákimshilik polıtsııa basqarmasy bastyǵynyń orynbasary Bolatbek Baıatanov.
Eske salaıyq, Almatyda qoǵamdyq kólik júrgizýge quqyǵy joq er adam avtobýspen jolaýshy tasyǵan. Sondaı-aq, Almatyda jol apattarynyń aldyn alý men onyń saldaryn azaıtýǵa baǵyttalǵan «Qaýipsiz jol» respýblıkalyq aılyǵy ótip jatqanyn habarlaǵan bolatynbyz.
Foto: polisia.kz
