Almatyda jyl basynan beri 9 adamdy poıyz basty

ALMATY. QazAqparat – Almatyda qalalyq júk tasymaly, magıstraldyq jeli jáne kólik polıtsııasynyń ókilderi oqýshylardy temirjoldaǵy qaýipsizdik erejelerin saqtaýǵa shaqyrdy, dep habarlaıdy QazAqparat tilshisi.

Mamandardyń aıtýynsha, bıylǵy jyldyń 9 aıynda Almaty qalasy mańynda poıyz 9 ret adam basyp, onyń 5-i qaza tapqan.

«2022 jyldyń 9 aıynda Almaty óńiriniń (Almaty-1, Almaty-2, Buryndaı, Shamalǵan, Baıserke, Qaırat stantsııalary) shekaralarynda lokomotıv brıgadalary bógde adamdardyń temirjolǵa shyǵyp ketýine baılanysty 132 ret shuǵyl tejeýdi qoldandy. Bul rette, adam basýdyń 9 jaǵdaıyna jol berilgen, onyń ishinde 5 jaǵdaı ólimmen aıaqtaldy. Negizgi sebep – zardap shekkenderdiń qaýipsizdik sharalaryn saqtamaýy. Joldy qysqartý úshin olar temirjol jelilerin belgilenbegen jerlerde, jaqyndap qalǵan poıyzdyń aldynan kesip ótpek bolǵan. Japa shekkenderdiń birinen alkogoldik ishimdik ishkeni, al ekinshisinde sýıtsıd faktisi anyqtaldy», - dedi mamandar.

Olar sondaı-aq, oqýshylardy qaýipsizdik erejelerin saqtaýǵa shaqyryp, temirjol nysandarynda gadjetterdi, qulaqqaptardy paıdalanbaýǵa, vagon tóbesine shyǵyp elektr toǵyna túsip qalmaýǵa, temirjol kópirleriniń metall konstrýktsııalaryna kóterilmeýge keńes berdi. Sondaı-aq, jasóspirimderge qaýipti jerlerde áleýmettik jelilerge arnalǵan beınerolıkter túsirmeýdi eskertti.