Almatyda jyl basynan beri 42 myńnan astam bala jaraqat aldy

ALMATY. QazAqparat – Jaz mezgilinde balalar arasynda jaraqat alý oqıǵalary jıileıdi. Bul týraly Almaty qalasy «Balalar shuǵyl medıtsınalyq járdem ortalyǵy» qabyldaý bóliminiń meńgerýshisi Meıirjan Qurmanalıev aıtty, dep habarlaıdy QazAqparat tilshisi.

Aıtýynsha, jyl basynan beri Almaty dárigerlerine 42 069 bala júgingen. Kóbine tómengi synyp oqýshylary jıi jaraqat alady. Balalar samokattan, velosıpedten, átkenshekten qulap qalyp jatady.

«Jaraqatty úıde de alyp jatady, 44%-ynda turmystyq jaraqat jaǵdaılary. Al, kóshede balalardyń 35%-y jaraqattanady», - dedi Meıirjan Qurmanalıev óńirlik kommýnıkatsııalar qyzmeti alańynda ótken baspasóz máslıhatynda.

Spıkerdiń sózinshe, kóshede jaraqattaný kóp jaǵdaıda balalardyń jol qozǵalysy erejelerin saqtamaýyna baılanysty bolady.

«Bul jerde de ata-analardyń róli mańyzdy. Olar balalarmen sóılesip, qarapaıym qaýipsizdik erejelerin túsindirýleri kerek. Demalys kezinde bala kúnniń kóp bóligin taza aýada ótkizedi. Sol sebepti, oǵan mindetti túrde kóshede qaýipsiz júrý erejelerin úıretken jón. Oıyn kezinde kishkentaı balalardy qaraýsyz qaldyrmaǵan durys. Qalamyzda jyldam qarqynmen damyp jatqan balalar alańdary, demalys aımaqtary kóp. Ókinishke qaraı, kóptegen ata-analar osyǵan mán bermeıdi. Qabyldanǵan qaýipsizdik sharalaryna qaramaı, balalar ata-analarynyń jaýapsyzdyǵynan kóptegen jaraqattarmen túsip jatady», - deıdi dáriger.

Sonymen qatar, ol balalarǵa qıyn jaǵdaıǵa tap bolǵanda, ata-anasyna ǵana emes, jedel qyzmetterge de qońyraý shala alatyndaryn aıtyp, túsindirý kerek ekenin tilge tıek etti.