Almatyda jyl basynan beri 400-den astam qalta urysy ustalǵan
ALMATY. QazAqparat - Osy aıda Almaty polıtsııasy 36 qalta urysyn ustady. Onyń ishinde 15 ury - árdaıym osyndaı qylmyspen aınalysatyn kánigi qylmyskerler, dep habarlaıdy QazAqparat qalalyq PD baspasóz qyzmetine silteme jasap.
«Bir oqıǵada 18 jastaǵy Taraz qalasynyń turǵyny qalta urlyǵyn jasaǵan. Ol 141-qoǵamdyq kólik baǵytynda jolaýshynyń uıaly telefonyn urlady. Kúdikti oqıǵa ornynda ustaldy. Dál sol ýaqytta 18-shi baǵdarmen júretin qoǵamdyq kólikte jedel izdestirý bóliminiń taǵy bir toby jolaýshyny tonaǵan 30 jastaǵy K. esimdi azamatty qolǵa túsirgen bolatyn. Ony jedel qyzmetkerler Seıfýllın dańǵyly men Maqataev kóshesiniń qıylysynda kólikten túsirip aldy. Kelesi kúni 99-shy avtobýsta jeńil aqsha tabýǵa qumar taǵy bir azamat ustaldy. 23 jastaǵy kúdikti 50 jastaǵy er adamnyń uıaly telefonyn bildirmeı qoldy qylǵan. Bul azamattar buryn da osyndaı qylmys jasaǵany úshin sotty bolǵan», - deıdi Almaty qalalyq PD krımınaldy polıtsııa basqarmasynyń bastyǵy, polıtsııa podpolkovnıgi Esen Ysqaqov.
Sonymen qatar, jedel bólimde aıtyp ótkendeı, jyl basynan beri Almatyda 517 qalta urlyǵyn jasaǵan 408 adam ustaldy. Onyń 9-y - sheteldikter. Olar Almaty qalasynyń aýmaǵynda 22 adamnyń múlkin urlaǵan.
«Qalta urlyǵynyń kópshiligi qoǵamdyq oryndarda, qoǵamdyq kólikte, halyq kóp jınalatyn oryndarda jasalady. Osyǵan baılanysty, Almaty qalasynyń polıtsııa basqarmasy múlik qaýipsizdigin qamtamasyz etý jóninde ótinish jasaıdy. Adam kóptep jınalatyn jerlerde óte saq jáne muqııat bolyńyz, qundy zattaryńyzdy ishki qaltada, adamnyń kózi túspeıtin jerde saqtaǵanyńyz jón. Sizge qarsy zańsyz áreketter jasalǵan jaǵdaıda, sonyń ishinde bótenniń múlki urlanǵanda, dereý 102 nómirine habarlasýyńyz», - deıdi podpolkovnık E. Ysqaqov.
