Almatyda jyl basynan beri 4 adam menıngokokk ınfektsııasyn juqtyrdy
ALMATY. QazAqparat - Almatyda jyl basynan beri 4 adam menıngokokk ınfektsııasyn juqtyrǵan. Onyń 2-eýi 14 jasqa deıingi bala, bireýi jasóspirim(15 jas) jáne bireýi eresek adam. Bul týraly Almaty qalalyq sanıtarııalyq-epıdemıologııalyq baqylaý departamentinen málim etti, dep habarlaıdy QazAqparat tilshisi.
«Menıngokokk ınfektsııasy – Neisseria meningitides bakterııa týdyratyn jiti ınfektsııalyq aýrý. Aýrý aýa arqyly beriledi (jótelgende, túshkirgende, sóıleskende). Menıngokokktiń alǵashqy spetsıfıkalyq belgileri bolmaıdy, qarapaıym sýyq tııýge uqsas bolady (temperatýranyń kóterilýi, bas aýrýy). Aýrýdyń belgileri paıda bolǵan jaǵdaıda, medıtsınalyq kómekke júginý kerek», - dep habarlady vedomstvoda.
Aýrýdyń negizgi klınıkalyq belgilerine: dene temperatýrasynyń 39,0°S jáne odan joǵary bolýy, bas aýrýy, júrek aınymaı qusý, gemorragııalyq bórtpe, moıyn bulshyqetteriniń kerneýi, tynys alýdyń buzylýy, aqyl-estiń buzylýy jatady.
«Menıngokokk ınfektsııasy qys jáne kóktem aılarynda órshı týsedi. Sebebi, bul ýaqytta adamnyń ımmýndyq júıesi bul ýaqyttarda kóptegen vırýstar - JRVI, tumaý jáne t.b. áserinen álsireıdi. Immýnıteti tolyq qalyptaspaýy sebepti kóbinese 5 jasqa deıingi balalar, sondaı-aq, shylym shegetin jasóspirimder, jas adamdar aýyrady», - dep habarlady qalalyq sanıtarııalyq-epıdemıologııalyq baqylaý departamentinde.
